 放大圖片
香港文匯報訊 容祖兒李克勤演唱會前晚進入第八場，適逢是星期五，盧淑儀再帶兩個囝囝來捧克勤場，另外李嘉欣夫婦、李治廷、梁詠琪、譚詠麟、蘇志威、杜麗莎等均有到場支持。前晚可說是兩人送禮之夜，不停送歌給助手、老婆、囝囝、媽咪，最後克勤更與全場過萬觀眾一齊代祖兒送了一首《龍的傳人》給劉浩龍（師兄），非常搞鬼。
祖兒當晚坦言想送首歌給她的另一半，觀眾聞言，已經狂叫「劉浩龍」，但祖兒解畫說：「呢個人係我工作上另一半 ，跟咗我十三年的助手Sandy，佢明日生日， 佢一路想聽我首國語歌《獨照》，今晚送畀佢。 」
輪到克勤，他就表示兩個囝囝前來捧場，克勤續說：「佢哋話想聽《一生想你》，所以我唱呢首歌送畀佢哋。」唱歌時，克勤的兩個囝囝非常開心，高舉他們支持爹哋的小燈牌，又揮手一齊唱，可愛度爆燈，但後來由於觀眾太興奮起哄，不停轉身想望住兩個囝囝，大會又打射燈到他們身上，克勤細仔被大光燈照到要用雙手掩眼，事後克勤叮囑觀眾，「你哋影還影，唔好放佢兩個上youtube！」祖兒見克勤對着兩兒揮手唱歌，大讚克勤慈父樣很吸引，很靚仔，又說見是送禮之夜，她也送歌曲《世上只有》給其母，而每晚也有來捧場的容媽媽感動得眼濕濕。
盧淑儀偕兩子拍手和唱
隨後，祖兒再問克勤：「你有冇歌要想畀啲日日來睇你嗰啲呀？畀啲表示好喎！」此時全場萬多觀眾齊叫「盧淑儀」，克勤即說：「我唔驚，驚咩，講咪講！」又叫祖兒不要眼甘甘望着他，並說：「我一定臉紅，你哋唔好嘈，等我組織下先......其實做演唱會台上嗰個雖然辛苦，但屋企嗰個都一樣辛苦，佢喺屋企打理晒所有嘢，朝早六點又送小朋友返學，由近開騷至今都辛苦咗幾個星期......」 祖兒插口說：「你唔係追人嗰陣作咗首歌畀人咩？以前追人就識吟詩作對，現在唔係乜都冇呀？」最後克勤送了當年追求老婆的名曲《你是我的太陽》給盧淑儀， 盧淑儀與囝囝大方拍掌和唱，反而台上的克勤就尷尷尬尬，有時甚至反轉望向另外一面觀眾，避對着老婆唱。
譚校長被拉上台做嘉賓
唱畢， 克勤滿頭大汗，祖兒追着他為他抹汗，克勤馬上反擊：「你又有冇歌送畀咩人呀？你唔好意思唱，我代你唱！」觀眾馬上起哄又狂叫「劉浩龍」，祖兒不停傻笑指自己沒有歌合適送，克勤馬上叫樂隊起音樂說：「我代你唱！起歌！」料不到樂隊起的歌是《龍的傳人》，全場觀眾馬上狂笑，克勤更抵死叫全場大合唱「遙遠的東方有一條龍，他的名字就叫浩龍」送給師兄。當克勤及全場觀眾合唱完頭兩句後，祖兒卻竟然跟着唱「巨龍巨龍你擦亮......」克勤大笑道：「巨龍巨龍我就唱唔出啦，留返畀你。」再令全場爆笑。
兩人互玩完一輪，克勤祖兒把譚校長由觀眾席拉了上台，校長上台後恭喜二人開騷，表示他剛從澳洲返港即來捧他們場，其後三人又合唱了《愛情陷阱》。而唱完返回觀眾席的校長不忘幽默笑說：「我識路，你哋放心，我唔會似阿Lam咁，放心。」
|
放大圖片
