 放大圖片
葉楚航今季重整旗鼓，開季到目前為止經已贏到十四場頭馬，目前正拋離第二位沈集成兩場，當然，以呢位前季冠軍練馬師嚟講，有咁嘅成績一啲都唔奇，假假哋都係冠軍，今季大部分馬匹回氣完畢，睇嚟倉主亦好想再重溫舊夢，不過另一方面，從未喺季初有過咁順暢開始嘅沈集成，今季亦有意圖想攞個冠軍玩吓。早年佢升正當練馬師接替愛倫嘅時候，曾經同身邊好友講，以愛倫為榜樣，希望有朝一日可以當上冠軍練馬師，不過，每一季呢個倉成績都係阿陀行路，中中哋，所以從未見過呢個馬房有染指冠軍之勢，但今季就唔同，開季到現時為止，經已贏得十二場頭馬，僅比葉楚航少兩場，當然，有冇機會坐上練馬師冠軍寶座，呢個仲係言之尚早問題，但沈廄季初氣勢非常好，尤其打谷戰，今季到現時為止，連日賽一共跑過七次谷戰，沈廄次次有馬贏，總共贏咗九場頭馬，單睇呢個數據，足以令大家有信心喺呢次夜賽再重拾信心捧呢個馬房場，所以大家不吼小心推敲一下呢個倉嘅戰駒。今次夜賽，出戰第四場谷草一哩嘅「凱倫之實」，經過季內兩場熱身賽之後，終於搵番莫雷拉上陣，事實上，季初呢隻馬所跑兩場熱身賽，均見走得不俗，一場由蔣嘉琦跑，另一場則由史卓豐上陣，均只係輸兩個餘馬位，證明呢隻馬本身有唔錯嘅狀態，只係未搵啱人選發揮，以致錯失一早建功良機，今次搵番曾經替呢隻馬贏過兩次嘅莫雷拉上陣，應該係交代嘅時候。
|
放大圖片
