 放大圖片
■胡定欣表示自己都覺得今年未夠班攞視后。
無綫舉辦的《萬千星輝頒獎典禮2015》下周日(13日)舉行，胡定欣憑劇集《鬼同你OT》入圍「最佳女主角」和「最受歡迎電視女角色」。早前定欣在大馬已經有零的突破，首度取得女主角獎項，令她在港再奪視后呼聲相當高。但定欣把視后一票投俾汪明荃，自言攞「最受歡迎電視女角色」或是劇集攞「最佳劇集」，已經好開心！■採訪：植毅儀／攝影：莫雪芝／髮型：Ai @Xeter Salon／化妝：Cyrus Lee／服裝及場地：agnes b@又一城
胡定欣與田蕊妮在《鬼同你OT》創造經典一幕，在一分鐘內一口氣同步說出百字對白，觀眾睇到拍案叫絕，網民封之為「神同步」，贏盡口碑兼收視，更視她們為今年視后大熱。說到因為角色姜蓉而受注意，定欣直言是入行以來最開心一次。「講真，呢個劇已經係8月時播，唔係台慶劇，但得到大家的認同，已經好開心。一個劇的成功，不是一、二個演員的功勞，是全組人的努力成果。其實台前幕後都花了很多工夫，我們都在有限資源內盡量做到合情合理，例如當時拍的過程，燈光師會打燈打到我不會有影子，我亦提醒自己不可太大動作、不可亂郁，連坐櫈都要凌空坐，因為一坐低、一挨椅背就會見到張櫈會郁。」
上位做女一壓力大
早前在《TVB馬來西亞星光薈萃頒獎典禮》胡定欣與田蕊妮雙喜臨門，齊齊獲封「最喜愛TVB女主角」及「最喜愛TVB電視角色」，當中定欣可謂零的突破，首度取得女主角獎項。對此，定欣在台上說得獎感受時哭成淚人，一番感人的說話，令台下幾位好姊妹也不知不覺眼紅紅。問到定欣可會有信心在香港舉行的頒獎禮上再下一城，她坦言信心不大，因為自己心目中的視后是汪明荃或田蕊妮。
「今次同阿田合作，你會見到佢對工作嗰團火。有好多嘢不是一朝一夕所得，你問我是否想拿視后，咁一定想，但不是今年，我希望係一個觀眾都覺得定欣值得攞的時候才攞，說穿了，我自己都覺得自己今年都未夠班攞。我入行13年，這一兩年，我個心再不像以前般擔心，因好多事都要累積、急不來，我從不覺得自己行得好慢、機會來得好遲。上咗去女主角呢個位，好大壓力，因為唔會有人教你『如何去做一個女主角』，好多事要自己去學習。我一直更重視如何演好角色，當然也會有個目標，慢慢讓自己向上爬，去追求在這行這個圈子的位置。所以我好佩服我們公司2位阿姐汪阿姐(汪明荃)同do姐(鄭裕玲)，她們在這行咁多年，都仲咁認真地工作，好值得我們去學習。所以我會投一票比汪阿姐，如果個劇拿『最佳劇集』，我都好開心。」
若結婚會低調進行
胡定欣當年參加無綫電視自辦的《全球華人新秀歌唱大賽》，晉身最後四強。入行十三年，一步步地走到一線花旦這位置，她等到求不得的觀眾緣，也累積到一班好朋友，和胡杏兒、胡蓓蔚等組成「胡說八道會」，一有時間就大家出來聚吓，分享近況，就連現任男友音樂人陳明道，更由「老竇」豹哥（單立文）介紹。
「我相信每件事發生都有其原因，做朋友都是如此，所有事都是 perfect timing。在這圈內，尤其是女仔，大家傾得埋、唔會比較，我會覺得難得，現在都幾年，感情更加厚，已經唔係淨係飲飲食食，會分享同經歷好多嘢。特別是豹哥係我『老竇』，佢在公在私比了很多意見我。最近杏兒快結婚，大家都好關心我的感情事，但其實結婚的事，我們未去想，一來我們拍拖都未夠一年，二來這一年間真的一劇接一劇，連休息的時間都唔足夠，真係會好少時間拍拖。好難得先放到假，離開香港幾日。當然，我都好想生小朋友，我又唔想太遲，而且也想親自湊大ＢＢ，如果將來真的結了婚，我會完成晒所有嘢，就告訴大家。」
|
放大圖片
