 放大圖片
今晚舉行猴年首次谷草八場賽事，以B欄C彎跑道作賽，頭場晚上七時十五分開跑，全晚共有兩場盃賽，分別為扶輪百週年挑戰盃及義勇軍挑戰盃。馬房方面，沈集成派出多匹實力馬列陣，可優先留意，另外半冷馬不妨一吼賀賢及李易達馬房。騎師方面，雷神、蘇兆輝及莫雅三位高手之坐騎均須留神。
第一場、第五班、一○○○米。「金在手」六歲南非馬在港跑過三季，但出賽不多只有十二戰，看今季已跑過七場，唯一上名響谷草同程跑入大冷腳，該役配吳嘉晉排二檔乃六十七倍大冷，起步貼欄搶放，鬥到拉士被「野外桃源」所擒，拚後再跑三戰仍跑谷草同程得第四最為接近，今次馬房打王牌再報谷草一千，存心搏殺有力施襲。
第二場、第五班、一八○○米。「自成一格」呢匹葉廄中距離馬，季初評五十分表現每況越下，然而上仗跑泥地一哩，六十三倍大卻後上追得兩咀，足証其狀態已復勇八九分，拚後更由雷神過檔出試考驗，備戰積極乃季內最認真一回，今次減到三十九分，練者打埋王牌出爭千八強項隨時可發威。
恆駿寶駒開竅再捷
第三場、第四班、一二○○米。「恆駿寶駒」四歲早熟短途佳駟，前仗爭此程在大慢閘情況下後上如箭入Q，對手弱是其中一項件，當晚場地偏慢也可能是因素之一；到上仗操足再爭此程，對手牌面弱而又無績可循者則比比皆是，結果廿九蚊大熱順利補中，拚後只加六分仍戰四班絕對有力再下一城。
第四場、第四班、一六五○米。「大勇士」五歲仔季內練者已開始中距離進軍，大前仗跑田草千六米輸七馬位算係唔差，因為係一場慢步速賽事，前次跑番谷草一哩，呢場用俊仔排二檔跟前入直路力追入腳，到上仗排外檔走外疊表現未見佳處，而今次抖足月餘練者仍再報一哩誓師必有殺着。
第五場、第四班、一二○○米。「好運有利」季內跑過六仗，於第四仗谷草五班千二配雷神大熱贏馬開齋，跟手殺上四班兩戰，前爭田草千二即刻被遺棄，嗰場雷神揀咗「魅力知心」跑第五，而「好運有利」則排劣檔後上入位；上仗回師谷草千二再俾梁家俊騎，臨場重飛後上不及跑第三，今趟雷神攞回帥印更獲排有利的二檔，趁勇再戰此程仍有望復前失。
勇創潮流重溫美夢
第六場、第三班、一六五○米。「勇創潮流」八歲老馬戰鬥力未盡退減，季內練者亦依舊專攻谷草一哩為主，然而上次刻意縮爭千二短途，臨場乃十倍半冷，結果後上追入冷位。拚後老馬仍有正常備戰，而今日三班有千二賽程，練者今次唔報揀番一哩強項出擊，環看今賽對手實力爾爾，應係贏馬黃金機會。
第七場、第三班、一二○○米。「及時取勝」季內轉到徐廄已跑過四場，首戰即重飛下傳捷報，翌仗輸在十二檔力追只跑第五，前排十一檔都能後上再贏，到上仗加至六十分，排六檔貼欄順放一氣放返，四戰取得三W，正好顯出那高昂的鬥志。今次升班路不作其他嘗試，再次選擇贏馬路程，最重要負磅有利仍有力爭取季內第四捷。
第八場、第三班、一○○○米。「威先生」（圖黃色綵衣）以前口重難留，朝早過於火猛，陣上也不懂留力，不過由大前仗開始已經收斂了很多，隨之其陣上的表現變得穩定，絕對是進步的實證。今晚繼續出戰谷草最短途一千米，此駒最近三場於同程取得一冠兩亞軍賽績出色，顯示出短途能力甚佳之餘，近況亦維持在作戰水平，今仗趁勇再搏，交出水準可前列而回。
|
放大圖片
