 放大圖片
今晚谷草編跑八場賽事，以全闊A跑道作賽，頭場下午七時十五分開跑，三T及六寶獎皆冇多寶累積，全晚唯一錦標為三班馬跑一千米競逐警察盃。馬房方面，蔡約翰及蘇保羅均派出不少實力馬列陣，值得優先留意。騎師方面，潘頓剛周日四喜臨門，今晚也手執不少惡馬，仍要盯實。
第一場、第五班、一二○○米。「回鄉更好」（圖9號）上季轉投呂健威馬房，並於轉倉後的首七仗交出兩冠兩亞，可見馬匹轉換新環境下確有進步。此駒之後卻一直未再上名，現評三十五分已較最近一次取勝時低十一分，記得前仗配何澤堯跑谷草五班一千米，僅以個多馬位不敵頭馬「你同我定」，上仗配潘頓卻全程走外疊乏表現，今回散熱再來慎防施回馬槍。
第二場、第四班、一二○○米。「越跑越好」蘇保羅當紮快馬，最近兩戰配韋達出爭谷草千二皆跑入三甲，而且臨場落飛亦成習慣，今季四戰之中，幾乎每次臨開跑前賠率都出現大幅度下瀉，可見幕後對此馬寄予厚望，而今仗再爭此程對手實力非強，應可贏番場向幕後作出交代。
紀利福星整裝待發
第三場、第四班、一二○○米。「紀利福星」質素甚高，前仗出爭谷草千二，賽日票數異常厲害，結果輕勝兩乘半，本身末段造廿二秒六八為全場最快，已造出超四班水準；上場排二檔形勢相約，除了負重磅外並無缺點，可惜力拚被「飛快叻」所擒未竟全功，而今仗以逸待勞才再爭千二，交出水準可前列而回。
第四場、第四班、一六五○米。「育成群駒」自前季評六十一分喺三班贏馬開齋後便未再獲勝，到上仗減至四十一分卒之作出反彈，練者搵史卓豐過磅縮爭田草千四米，五檔起步沿途守在四五位，入直路兜出中疊打衝鋒力挫「再石磨藍」，拚後打仔馬狀態仍勇，今次改爭谷草一哩亦合發揮，環看今組對手實力平平，有力再締佳績。
第五場、第四班、一八○○米。「寶正寶」上季初出至今一直未能打開勝利之門，上名次數亦偏少，出賽廿二場僅取得一亞兩季，回頭看當日被編入二班評八十二分，真的太看得起牠。上次由三班落到四班跑谷草千八，對手的級數大不如前，莫雅亦發揮水準，可惜影相負頭位落敗，今次抖足月餘再戰，練者矢志要爭出頭。
第六場、第三班、一○○○米。「威先生」季內五戰谷草一千米，就取得三冠兩亞佳績，好明顯係此程專家，奇就奇在，此駒自十月份在此程打開勝利之後，練馬師何良竟然會安排呢匹新勝馬轉戰泥地千二，結果未能試出彩虹。幸好此駒其後四仗重返谷草強項表現出色，今仗用王牌而來決心明顯，當有力謀取季內第四W。
第七場、第二班、一二○○米。「永旺年年」四歲馬踏入今季表現不斷進步，頭兩仗出爭田草千二遇強敵跑入亞席；前仗初次渡江出爭谷草千二，在雷神胯下贏得精采，上仗臨場換俊仔升二班再爭勝途，臨場落飛打到廿六蚊，後上輕鬆再捷，今次小休加六分再戰此程，憑其速度操控步速形勢，交出水準可連下三城。
第八場、第三班、一六五○米。「開心駿馬」大前仗跑四班谷草一哩贏馬；前仗再跑同程卻嚴重走樣，輸近廿個身位，呢場韋達發揮差勁，全程走外疊燒乾，放得太快乃落敗關鍵；上仗改配吳嘉晉獲減五磅，又排一檔靚位形勢有利，臨場亦大注落飛，騎者亦打爭氣波一放到底掄元，今次升班只負輕磅再戰勝途，擺前且戰且走，具添食本錢。
|
放大圖片
