 放大圖片
何良呢幾日頻頻入倉，注意力只係集中喺兩隻馬身上，分別係「威先生」同「輕越直前」（圖11號），下午例牌安排蘇狄雄踱「輕越直前」，副練麥子文則踱「威先生」於地堂操練，倉主就喺欄邊睇到實一實，而踱步期間，何良吩咐鞍上人一定要好慢咁踱呢兩隻馬，唔准踱到佢哋起火搶口，結果「威先生」及「輕越直前」都好文靜咁踱畢整個過程，據悉「輕越直前」馬身養得好靚，狀態亦係季內最靚一次，至於「威先生」，變得文靜內斂，贏完馬越趨成熟，呢個係好現象，「輕越直前」今季最靚，呢隻十歲馬，今季經已跑過三場季軍，睇吓可唔可以退役前贏番場作光榮退役。
莫雅話驍武合一哩
跑馬嘅嘢，千祈咪睇死任何一駒，好似上個禮拜日咁，「亞馬寶寶」九十九倍爆入第二名冷腳，另外一隻蔣小妹所騎「盈豐駿駒」，田草十一比零，結果俾佢零的突破，喺田草千四米跑入一席亞軍，呢啲數據，分分鐘蝦死人。
今次有隻半冷門值得大家注意，呢隻就係霍利時馬房「驍武」，呢匹馬至今只贏過一場田草千二米咁大把，之後有三場谷草千二米入位，好多人以為佢必定係短途馬，但霍利時思前想後，結果作出大膽嘗試，上場替佢報跑谷草一哩，並由莫雅出騎，點知狂輸四十個身位返嚟。今次馬房再同佢報跑谷草一哩，倉主有日吩咐副練，搵定一個外籍騎馬人同呢隻馬加課踱步，呢位外籍騎馬人好不屑咁講，又係踱呢隻死馬，副練聽到立刻指正，阿頭吩咐俾心機去替呢隻馬做工夫就做工夫，咪咁多聲氣，而呢位外籍騎馬人所指死馬「驍武」，經副練透露並唔係咁死，分分鐘有機會喺今場爆冷。
話說上次「驍武」用莫雅跑一哩，賽前倉主經已同莫雅溝通，希望呢仗能替呢隻馬跑出成績，即使一時三刻唔能夠贏，亦希望印證呢隻馬有否長力應付一哩，雖然上次大敗四十多個身位，賽後有消息知道，莫雅向阿頭匯報輸四十個身位，純因該場有「創基寶」墮馬意外影響發揮，莫雅一滴都冇騎過，但經佢試過呢仗一哩後，可以肯定「驍武」跑一哩必定勝任，今次由韋達一試，呢位仁兄目前成為冷門騎師，騎一啲無厘頭馬，分分鐘會交出另眼相看表現，所以話呢個世界，千祈唔好睇小人，馬亦一樣。
永旺年年成哥緊張
沈集成上個禮拜憑小妹隻「幸運年年」捧走今屆評馬協進會盃，近日心情靚絕，好似開籠雀咁，最後試跑朝，更親自替「永旺年年」於地堂踱步及教閘，並以副練丁冠豪「杰歡騰」作伴，當做完晒一切工夫後，即命徐貴良取排位俾佢過目，當徐貴良手取排位紙時，倉主即急不及待問「永旺年年」排第幾檔，徐貴良立刻回應排十檔，倉主得知，即表示點解運氣咁差，跟住再追問埋「杰歡騰」排檔，徐貴良再度回答，又係排外檔，呢隻排十一檔仲差，倉主無可奈何，猛呻點解咁黑仔，不過，由上述動態可以見到，佢係好關心「永旺年年」呢隻馬，雖然今次排檔唔係咁理想，但有莫雷拉之助，依然唔可以輕視。
|
放大圖片
