 放大圖片
第一場、第五班、一六五○米。「萬醒仔」是由馬主自行培育，在外地兩戰全勝，展現強橫後勁，性能跟同父同母「萬醒駒」接近，潛質應該唔錯，但來港後跑十四場都唔上名，表現相當失望，上年十一月上旬轉投苗廄，晨課操練不斷施壓，上陣四場雖然無表現，但所負距離越輸越短，目前減至四十分乃來港新低點，今次出戰五班賽事已贏盡班底，半冷馬膽博得過。
第二場、第五班、一二○○米。「佳景名駒」上年六月進行閹割，馬匹身體的荷爾蒙，通常需要三至六個月調節，此駒在近期晨課表現變得收斂，急躁脾性有明顯改善，四歲馬進度日益好轉。「佳景名駒」來港兩季只跑過十一場，一旦成熟開竅之後，絕非五班可以留得住，小休三個月後經上場作重新開氣，埋門操練工夫顯著加強，估計今場將會揭開面紗。
第四場、第四班、一八○○米。「勝利仔」上季來港在鄭廄兩戰無功，今季轉投賀賢發展，季內六場雖然未曾跑入三甲，但近仗都輸唔遠，二月份初跑谷中一哩，後上跑第七只輸兩個多馬位走勢見好；之後返田草縮程千二得第六；上次重返谷中一哩又跑第六，呢三場最遠輸唔夠五個馬位，目前評四十分可跑五班，但馬房安排出戰四班負輕磅，四歲質新未見底馬質態兼備，有胃口可期橫掃。
|
放大圖片
