|
今季到目前為止容天鵬已勝出二十二場頭馬，練者對成績感到滿意，容天鵬表示，馬房能夠有好成績，要多謝馬主嘅支持，希望季內餘下賽事繼續蒙幸運之神嘅眷顧，將成績進一步推高。
今次沙田賽事容天鵬派遣多駒參戰，當中不乏有爭勝機會嘅實力分子，相信要增添頭馬成績唔難。喺二班千四米有「天時駿駒」同「正大光明」兩駒列陣，練者表示，兩駒在千四米均有好表現，期望可以構成馬房連贏。剛戰在田草二班千二米跑得季軍的「正大光明」，今仗角逐千四米，容天鵬說：「馬兒今季出賽唔多，只跑咗三次，體力充足在季尾是有優勢，剛戰賽後復課狀態更佳，路程加長二百米適合發揮，如陣上沒有意外，交出水準，成績應會比上仗更進一步。」
同場廄侶「天時駿駒」，今季上陣多仗越跑越好，上仗在千四米贏得季內首場頭馬，今仗同程再上陣，練者說：「剛戰馬兒雖然勝出，其實賽前冇乜信心，因為隻馬曾發燒而影響進度，痊癒後復課狀態未十足，而且排在外檔，能夠有好表現，主要是嗰場實力馬表現失準，勝後狀態仍保持得好好，希望可以乘勇再下一城。」
|
