|
大摩剛周三再顯盃王本色，憑「蓮花巨星」攻下法國賽馬會盃。明日十場泥草混合賽，此廄駐下重兵，似乎有意延續勝勢，值得高度重視。
剛戰喺田草千六米獲季軍嘅「壯思飛」，今縮程喺千四米上陣，大摩說：「隻馬擁有高質，來港後成熟循序漸進，畢竟是北半球自購馬，需要點時間適應環境，跑到第三場有上名成績交出，狀態比預期來得快，最近莫雷拉親自操咗幾課，對牠的評價相當正面，認為隻馬已有唔錯嘅戰鬥水準。我希望牠今仗會有突破性演出。」
今季六戰獲一冠兩亞嘅「人民武士」，剛戰喺田草千四米僅不敵「南京之友」獲亞，今次再戰，大摩表示：「隻馬近兩戰唔多夠運，尤其是前一場整條直路被困在內欄，完全冇跑過咁滯。上賽直路一度出咗頭，勝利在望之際，誰不知貝湯美在最後三百米右邊韁繩脫手，結果在終點前數步被他駒越過，再一次應勝變敗認真可惜，不過跑馬就是咁樣，就算隻馬有幾高質素及好狀態，只要陣上際遇唔好一樣冇得贏。無可否認隻馬現時狀態確實相當勇，只要到時能夠發揮出應有水準，便好有機會贏得季內第二場勝仗。」
|
