■余安安淡然面對失敗的婚姻。香港文匯報訊 余安安16歲便被發掘入行，憑着「香香公主」一角成為當紅花旦。經歷過兩段失敗婚姻的她，現時醉心於舞台劇工作。近日，她接受有線《星級會客室》專訪，與汪曼玲細訴入行經過，以及當單親媽媽的辛酸。
余安安當年邊讀書邊當兼職模特兒，後來被周梁淑怡賞識，邀請拍攝電視劇集，星途看似十分順利，原來她曾險被「雪藏」，更被取消唱《人在旅途灑淚時》的機會，「當年登台賺好多錢，有次登台加場，我無依期返嚟拍劇，結果畀人抽起我個角色，錄咗嘅主題曲都搵過第二個歌手唱，估唔到首歌後來咁紅，只怪自己貪錢！」參與過不少劇集、電影的余安安，近年醉心於舞台劇工作，更在今年首奪「最佳女主角」舞台劇獎，不過她直言做舞台劇亦十分辛苦，「記台詞都幾辛苦，我平時鍾意飲返兩杯，但一接咗劇就起碼半年唔飲酒，想頭腦保持清醒，亦會減少出街應酬，盡量呈現最好狀態。」
愛情至上無悔閃婚
余安安於1983年與周潤發閃電結婚，9個月後閃電離婚，轟動整個娛樂圈；其後她與賽車手李萬祺再婚，結果仍是離婚收場。余安安自認愛情至上，「如果唔係就唔會閃婚、閃離啦！」經歷過兩段失敗的婚姻，余安安淡然面對：「離兩次婚好多咩？嗰啲係人生嘅一頁，人生有好多頁。離婚後都有拍過拖，但未係真，如果搵到值得嘅人，我都會『中』落去，不過現在唔會咁衝動。」余安安無悔過往的決定，反而感激遇過的一切，「以前唔享受工作，覺得好辛苦唔想做咪結婚，離婚後復出先識珍惜工作機會，更畀心機去做。」
余安安懷有第一個女兒時，便毅然放棄事業，「我決定放棄工作嗰段時間，正值電影蓬勃期，不過有得必有失，可以陪住兩個囡囡成長好重要。」離婚後當上單親媽媽，余安安憶述過程中的辛酸，「一個小朋友嘅成長需要父母，自己擔當兩個角色唔容易，囡囡反叛期時我會匿埋喊。」
即將榮升外母的她，並未與大女兒分享失婚經歷，「呢啲係佢自己嘅選擇，我會全力支持，加上我都好鍾意呢個未來女婿，我相信囡囡嘅眼光，不過依家諗到就有啲唔捨得，雖然佢哋住得好近，但始終有種分開嘅感覺。」