胡森、岳敦、許怡及卓普咸等英籍練馬師，過往在港練馬時，由於過份依重歐洲馬，最終失敗收場，北半球馬普遍較為遲熟，縱使是在外地跑過的自購馬，由於香港與歐洲的訓練環境大有不同，所以北半球馬通常需要六個月以上才能適應新環境，此外，在歐洲出賽的馬匹，大部份都是雄馬，香港馬主購入的自購馬，通常會在運港後並於初次出賽前進行閹割手術。
講開馬匹貨源，大摩無論買自購馬抑或自購新馬都屢有佳作，而他的購馬策略，近年都維持不變，這亦是其成功之道，南半球方面，大摩除寶貝仔喬治摩亞幫手之外，近年最得大摩歡心就肯定非佢胞弟摩加利莫屬，其實近呢兩季唔難發覺，大摩由過往以英愛馬匹為頂班主力兵源，到呢兩季喺比例上，則以澳洲馬匹為重心，事關歐洲馬價貴得離譜，年前細摩放棄喺澳門從練，返回澳洲發展，雖然話係為大仔摩力高日後從練鋪定後路，另一方面就成為大摩靠得住好兄弟，替佢物色良駒之餘，亦有自己馬房設施作為訓練基地，全力支援大摩。摩家軍呢個完善一條龍服務，的確令旗下馬主更加放心同佢哋入貨，剛季三料馬王「明月千里」正係經細摩在當地入貨，新季大馬主蘇啟聲、蕭百君等，俱已搵摩氏家族於澳洲入貨，相信摩家軍不難再喺來季分級賽繼續橫掃。