周日將在沙田上演兩泥八草共十場日馬賽事，重頭戲是由第一班馬角逐田草千四米廣東讓賽盃，今屆有十二匹馬報名角逐，當中以大摩嘅「壯思飛」（圖5號）實力較為突出，相信會成為眾人焦點。「壯思飛」係上季來港嘅愛爾蘭自購馬，來港前曾在當地跑過九場，其中有七仗非勝即位，甚至曾喺法國三級賽報捷。來港後經兩仗熱身後轉由莫雷拉執韁便火速上位，先在田草千六米入圍，跟住喺千六及千四米取得連勝，蹄下敗將「太陽喜喜」及「東方快車」都係上季有好戰績嘅賽駒，而季尾最後一戰初配韋達也能跟廄侶「喜蓮獎星」串Ｑ，後駒當時跑出破班際紀錄時間，由此可見，「壯思飛」呢席亞軍絕對不失禮，今季成熟更足下，相信是大摩喺各項大賽爭功嘅棋子之一。而大摩今次獨派此駒出戰廣東讓賽盃，顯然對隻馬信心十足，應該係呢項錦標呼聲最高嘅一駒。
葉、方、呂、東四廄均喺呢項錦標雙龍出海，當中以葉廄嘅「隨心隨意」同「聰敏不凡」最有睇頭，因為兩隻馬都係路程專家，喺呢個路程已合共贏得九場頭馬，而且對上一仗都能贏得頭馬，只要跑出水準，絕對有染指錦標嘅實力。而呂廄一對「軍」系馬，應以「軍火」機會較高，起碼上季贏過一班賽同埋喺田草有頭馬成績，呢兩樣係廄侶「軍歌」欠缺嘅。東廄一對馬「醒目名駒」同「喜蓮巨星」，齋計往績當然以後駒最勁，畢竟是前季遮打盃盟主，不過上季沉足成季，到目前仍未有復甦跡象，以現時狀態，相信要喺呢度分一杯羮是有難度。反而「醒目名駒」雖然呢個路程未贏過馬，但上季喺566總場次僅輸俾「佳龍駒」而壓倒「包裝鬥士」同「有得威」得亞軍，今次只要跑番呢場水準，相信是有入圍機會。而方仔嘅「豪逸」同埋「喜喜寶」，前駒剛於開鑼日衛冕特首盃失敗而得梗頸四，有可能將目標轉移到今戰，贏番個盃補數。至於「喜喜寶」，眾所周知只擅於窄場，相信今場是熱身性質。
苗禮德馬房嘅「馬上發財」將在今戰掛頭牌上陣，不過實力一啲都唔突出，因為到目前為止呢隻馬喺田草只係上過一次名，仲要係三班賽，相反跑谷草就犀利無比，九戰谷草得四勝四位成績，睇嚟今戰係志在開吓氣。
上季冠軍馬房蔡約翰周日獨出一駒，就係派遣「鈦金剛」出戰此項錦標，不過呢隻馬至今累積七勝四位全在千六米或以上途程，千四米以下路程都未威過，何況上季四捷令評分累積唔少升幅，初跑一班賽要發難非易事。