■李克勤和容祖兒向歌迷送燈籠。香港文匯報訊（記者 植植）容祖兒和李克勤前晚在東莞舉行巡迴演唱會，全場爆滿，整晚氣氛熱烈到超晒標，觀眾整晚大合唱，揮動的熒光棒和手機到散場也沒停過。祖兒在台上問：「究竟進了多少人？你們人多到好像坐上了天花板。」來形容全場爆滿盛況。觀眾熱情，兩人更忘形，結果安歌超時唱多近一小時，最後唱到近午夜十二時才結束。巡迴一周年紀念，又臨近中秋，大會送上人仔咁大燒豬作拜神用，還準備了東莞月餅及燈籠給他們提早過節，克勤好友更為賀一周年，送來超級靚鮑魚慶祝，令兩人十分開心。
前晚是英超曼聯主場對曼城，曼聯球迷李克勤一直心掛掛， 結果祖兒窩心發動所有身邊工作人員，為好友提供wifi及可以看到比賽的設備，祖兒笑道：「我這個非球迷其實體會唔到佢睇唔到場波係咩心情，我只係見佢開騷前喺後台， 突然好似腎上腺素向上激增咁，坐立不安，手心冒汗，眼又飄冇咗神！於是我覺得我要雪中送炭，咪發動所有工作人員，搵齊wifi ，又下載了個可以睇到波的app畀佢睇，等佢睇到少少可以心息，安定返佢心神去做騷！」
曼聯最終輸波，克勤謂其實他於台底一早收到老婆傳來短信的消息，「化悲憤為力量啦，所以唱到十二點，哈哈。」祖兒說：「佢講笑，關咩鬼曼聯輸定贏，我們兩個真係好鍾意唱歌就真，都成日唱到唔想落台。東莞班觀眾真係好勁，坐喺天花板咁高都一樣成晚同我們一齊大叫大唱，反應好到不得了，搞到我兩個都high到唔想走！」
祖兒中秋派月餅行善
問到兩人，今年中秋準備如何度過，祖兒謂霆鋒一早贊助了月餅給她，中秋她會分兩日，先是聯同Twins ，鄭希怡等組團去有關善慈團體派月餅，另外自己的慈善基金會又會再去派多日，希望可以帶多些溫暖給所需人士，讓大家一起開心過一個溫情中秋節。而她自己就沒準備大慶祝，「都係同屋企人食過節飯咁，咁大個人，唔會再玩燈籠啦。中秋可能去湊最新養隻小狗返來過節啦，佢五個月大，唔知我係咪唔識照顧，最初帶佢返屋企，佢超精靈，咁咪不停同佢玩，點知原來咁細狗狗，係唔可以玩，每日要瞓二十個鐘，佢玩得開心得滯，第二日突然好沒精神，嚇死我好擔心，即刻送返去畀朋友幫我照顧佢，聽講我離港幾日，佢瞓返足晒，身體又好返，不過我又要飛，所以掛住都沒計啦，要工作完返來先可以去湊返佢回家。」
克勤為兒子買定燈籠
二十四孝父親克勤就一早已經準備好燈籠，他說：「我一定要玩燈籠，哈哈，一早買定最hit的比卡超燈籠畀『細老闆』，佢有捉精靈，一定like 。『大老闆』就揀了星戰燈籠畀佢。另外朋友又送了星戰朱古力月餅，咩都準備好，到時咪帶他們出去賞月同陪玩陪食。」