本周六將於沙田馬場上演十一場草地日馬賽事，喺度先同大家研究吓當日兩場重頭戲，即係剛升格為國際三級賽國慶盃及慶典盃嘅形勢。
途程為一千米直路賽的國慶盃只得七匹馬報名，由於線路單純兼馬匹實力參差，形勢睇起來較明朗，頭馬相信會是東摩之爭。當中以告東尼馬房嘅「幸福指數」（圖）值得秤高些少。「幸福指數」上季先摘下浪琴表香港短途錦標桂冠，是今場唯一能勝出G1嘅賽駒，而季尾喺沙田銀瓶彈離群駒摘冠，今場主要對手好似「新力風」、「華恩庭」同埋「控制者」都喺嗰場對賽過而成為蹄下敗將，令到「幸福指數」喺今屆國慶盃有一支獨秀嘅感覺。而賽前練馬師告東尼亦安排「幸福指數」喺今個月二十號試課田草一千米大閘，結果在蔡明紹胯下率先衝過終點，而大摩嘅「新力風」就僅以半個身位之差跑得第二名。由此可見「幸福指數」狀態已處作戰水準，餘駒要捊虎鬚並非易事。大摩件「新力風」雖然在上季沙田銀瓶同埋今季課大閘輸過俾「幸福指數」，不過隻馬在直路賽五戰得三冠兩亞全上名，而且在沙田銀瓶是負一三三磅之下不敵負一三○磅嘅「幸福指數」，今場負磅掉番轉，「幸福指數」要負一三三磅，而「新力風」就掉番轉負一三○磅，加上大摩馬匹在盃賽常有神來之筆，絕對有能力成為攔路虎。至於第三勢力應該要數到「華恩庭」同「崇山寶」，前駒質新未見底，後駒直路賽績靚，都有入位機會。而「控制者」同「金滿載」級數唔夠兼直路賽績麻麻，要創造奇蹟唔容易。
途程為千四米嘅慶典盃，十二匹馬報名角逐，摩東兩廄已佔咗七匹，相信兩廄控制大局機會甚高。大摩三駒之中，戰績最好是「飛來猛」，喺同程累積六勝四位；「壯思飛」同「喜蓮獎星」就擁有高質。三駒都有爭勝條件，只係睇吓大摩到時用邊隻作為主攻手。東廄四駒之中，「醒目名駒」與「喜蓮巨星」跑千四嫌短，以兩匹「美麗」系馬最惡，「美麗大師」跑千四米三次得冠亞季各一未甩過三甲；「美麗之星」就擅放容易賺形勢，一放一追，相信呢對馬會是摩家軍嘅頭號勁敵。第三勢力係蔡廄隻「詠彩繽紛」，六戰千四米錄得五冠一季全上名，來港兩季首戰均能取得勝仗，加上過往亦曾負重磅贏馬，今回縱使要掛頭牌應戰亦冇有怕。葉廄嘅「天才」及「聰敏不凡」就輸點級數，止於爭位。苗廄嘅「馬上發財」至今四場頭馬全出自谷草賽事，闊場都未威過。