■王浩信夫婦大跳華爾茲舞。香港文匯報訊（記者 梁靜儀）王浩信與陳自瑤（Yoyo）昨日以夫妻檔到將軍澳出席《Hello Kitty LINE FRIENDS》華爾茲匯演。活動上二人大跳華爾茲舞外，王浩信又透露聖誕願望是想有更多時間陪家人，一家人過聖誕，至於Yoyo就想去旅行。
王浩信有份演出的台慶劇《致命復活》已進入結局周，問到誰是幕後黑手，他就大賣關子：「透露咗就唔好玩，之前同同事講個結局，佢哋反應都喜出望外，大家都猜測係我阿媽心姐（謝雪心），我只可以講我媽唔係Big Boss，老婆都有逼供問劇情，我只能講句，結局令人始料不及，要睇過至知。」知道答案的Yoyo就表示自己因未必有時間睇，所以有追問結局，聽到都覺得意外。
遇發哥齊講圍頭話
昨日王浩信上載拍劇巧遇周潤發的合照到互聯網，並留言：「我等左（咗）十一年終於比（畀）我見到發哥本尊，佢重（仲）同我講圍頭話，真係無憾，巧能蟹（圍頭話好能幹的意思）！發哥，多謝你！渠頭，多謝你！」他表示日前在烏蛟騰拍劇，聽講有人經常都遇到發哥，但他總是遇不到，這次終於給他遇到發哥，他開心的說：「發哥除咗畀我鼓勵，仲有問我圍頭話難唔難學？ 證明佢有睇套劇，（叫發哥投你視帝一票？）唔好啦！相信佢眼睛係雪亮嘅。」
另外，談到同公司的李潤庭近日被爆背妻偷食，妻子選擇離婚，結婚多年仍然恩愛的王浩信與陳自瑤，被問到如何維繫感情？王浩信說：「人家嘅事唔講太多，夫妻最重要充足溝通同信任。」Yoyo就說：「自己有個好好家庭，就要好好珍惜。」