■加入TVB十年的張頴康(右)上月首次奪得電視獎。香港文匯報訊 上月在《馬來西亞星光薈萃頒獎典禮2016》獲得「最喜愛TVB飛躍男藝員」的張頴康，近日作客TVB娛樂新聞台節目，大談入行16年的苦與樂。
張頴康表示拍攝《東坡家事》及《貓屎媽媽》曾被導演，甚至資深演員質疑演繹的方法，他說：「當年拍《東坡家事》，我用咗一個時裝的手法飾演皇帝，由於我唔想同人哋一樣，所以用咗一個搞鬼的手法去做，不過當時有導演質疑我得唔得，好彩出街之後觀眾反應唔錯，有少少爭回一口氣；而拍《貓屎媽媽》，我又當自己係大俠咁做，亦有位資深演員話我咁做唔得，話會違反角色，我覺得應該嘗試咗先，如果唔係唔知道觀眾鍾唔鍾意。」
另外，阿康表示拍《宮心計》拍得不太開心，令他對演戲心灰意冷，他說：「當時做太監，集集企喺陳豪後面，但好少對白，當有一集有對白時，我唔想NG，我要話畀人知我係得，所以那段對白我背咗兩個月，入晒腦，到今時今日我都仲背到出來，好開心監製睇得到，令我有機會拍《公主駕到》。」
華仔稱為阿康驕傲
曾經出過兩首歌的張頴康表示較喜歡演戲，他說：「唱歌唔好搞，怕嚇親觀眾，當年因為自己拍戲上唔到主流，所以先唱歌。其實我唔太享受唱歌，登台唱歌還可以，我始終都係鍾意演戲。」
訪問中提到伯樂劉德華，面對着「劉德華契仔」這個名字，張頴康說：「我好唔鍾意呢個名，真係好大壓力，如果做得唔好，驚影響到劉德華呢個名。」談到他6年前曾有意離開娛樂圈，有否找華仔幫忙時，他說：「係華哥幫我搭路入TVB，之後我一直都冇搵佢，就算近年某啲角色有迴響都冇搵，我唔想提華哥，亦唔想靠佢個名而得到工作。如果我當年唔掂，做文員時搵佢，我諗我實被佢鬧到飛起，話我唔夠堅持。」
訪問尾聲，播出了華仔恭喜張穎康的片段，令阿康驚喜萬分，華仔表示恭喜阿康於大馬獲獎，而且為阿康而驕傲！並表示不介意阿康提及自己。張穎康激動說：「呢啲老闆邊度搵？最近先夠膽想搵方法話佢知我拿獎，唔知講乜好，真係好開心，好想搞慶功！」