今晚谷草安排八場賽事，以B欄C彎跑道進行，頭場下午七時十五分開跑，全晚唯一盃賽為心光盲人院暨學校一百二十週年紀念盃。馬房方面，蔡約翰、蘇保羅及姚本輝之參戰馬均可留意。騎師方面，雷神及潘頓皆手執多匹惡馬，值得重視，另外祈普敦之坐騎也要一吼。
第一場、第四班、一二○○米。「你知我意」季內四戰，第二仗初次角逐谷草千二，臨場是接近三十倍冷馬，結果跑入第五有試準味道；前次再跑此程閘前落飛打到四十三蚊熱門，終在重票下取得首捷，有識之士果然神通廣大；上次再度出爭勝途，臨場卻回飛已知不妙只跑第五；今回抖夠再攻同程，臨場若有風吹草動可吼實。
第二場、第五班、一八○○米。「樂家將」季內六戰，第三仗初涉足谷草一哩，沿途放得快沒有回氣位，最終只落後冠軍馬「天賦致寶」不足一乘，賽績毫不失禮；近三場處理手法更有條理，直落三場入Q表現夠晒忠心，目前顯然已搵到谷草新出路，六歲馬乘這陣子狀態仍勇，結合跑法主動穩佔先機，今戰轉爭千八絕對夠條件爭取勝仗。
奔虹赤矢志拚出頭
第三場、第四班、一二○○米。「奔虹赤」葉廄質新之輩，季內第四仗角逐谷草千二起票搏殺，結果後追跑入第三名；惟翌仗卻增程跑一哩，並採取前置策略，最後證實氣量不足以應付中距離；上次立即糾正錯誤縮回跑千二米搏殺，入彎打衝鋒窒步下只跑第五；今回練者打王牌再報此程，如交回早前上名一役水準，在此具備坐位望贏機會。
第四場、第四班、一六五○米。「勁勇威龍」上季養在胡森馬房，最多可以連續兩場上名，但係今季轉到文家良馬房後，由昔日孱仔變成大隻仔，已經連續五場喺谷草同程上名，足證呢件七歲馬真係好襟搏，而上仗力拚險勝後復課狀態未見回落，今次仍爭一哩首本戲當可繼續捧場。
第五場、第三班、一○○○米。「實力飛駒」於谷草一千米八戰合共累積三冠三亞一殿一第五，反映性能獨沽一味；上回初次增程跑千二，喺祈普敦胯下由十二檔出閘後即搶放有聲有色，最後就放入一席接近的第四，可見其狀態絕對唔差；今場練者報回一千強項捲土重來，當有力拚勝。
第六場、第三班、一二○○米。「運財童子」今季頭三仗出爭田草千二取得一冠兩季軍；第四仗增程千四亦得第二；近兩仗表現卻強差人意，當中上仗雖初跑谷草千二，但係臨場仍備受追捧，結果採取均速跑法快跟大半程，入直路衝刺僅保持速度而敗近；經試準後今次練者打王牌再來，計番「運財童子」同父馬如「勝一籌」屬窄場高手，加上今次雷神仍鍥而不捨再騎，相信必有進步表現可見，值得重視。
第七場､第三班、一六五○米。「雷公鑿」（圖12號）自從評分跌穿六字頭，連場直路交出可人追勁，即使前仗贏馬之前跑田草一哩，面對三W馬「喜旺寶」也所負不多，自購馬評分顯然已找到承接力，故此上仗重返大前仗初跑谷草不敵「加州再豫」入Q嘅一哩同程，配黎海榮捧到三十七蚊信心十足下開胡；今仗再捷冇難度。
第八場、第二班、一二○○米。「海翡翠」季內第三W在此程造出一分零九秒四二，是本季多場谷草千二米最快，三歲馬的潛力確實驚人，未來的成就看俏，再看上仗殺上頂班爭同程，八檔出閘應聲彈出，雷神採取一貫領放戰略，最後百餘米一度透出，最後與「越影」同時過終點獲平頭冠軍；今仗降二班作賽當有望衛擊季內第六W。