■傅嘉莉稱對象不用大富大貴。為熱播劇集《我瞞結婚了》剪短頭髮的傅嘉莉（Kelly）飾演水底攝影師兼潛水教練，陽光味十足的造型大受歡迎。Kelly本身是模特兒出身，2年前簽約TVB成為「親生女」，劇集一個接一個。原本前途一片光明，無奈每次有劇推出都成為雜誌封面人物，並冠上「小三」之名，對此，Kelly剖白拍拖心聲，自言不會做第三者。
做了十年模特兒，Kelly轉戰「公仔箱」。她本身是中德混血兒，憑一副標致臉孔而在TVB殺出一條路，無奈卻一次又一次成為雜誌封面，更有「所謂」的情慾短訊流出，對於一切流言蜚語，Kelly表示清者自清。
「可能轉咗型，做咗電視藝人更入屋，觀眾對我認識多咗，變相新聞就多咗，我諗係電視藝人要面對的事。之前所謂的情慾短訊，根本就是子虛烏有的事。我的微信不是呢個介面，我都有同公司傾過，公司好信任我。大家出來做朋友，未必知咁多background，未必會問『你結咗婚未？你有冇小朋友呀？』這些問題，但如果再深入發展，討論拍拖，會問清楚對方背景，如果對方真係有女朋友或太太，我會先叫對方搞好自己的stage。呢個主導權唔喺我手，但我可以講，至今都沒做過第三者。」
拍拖會低調
在《我瞞結婚了》中，Kelly與洪永城有不少對手戲之餘，更會有咀戲。劇情以洪永城瞞婚為主，問到Kelly現實中如果將來拍拖或結婚，可會大方承認？她表示藝人平時已經常「赤裸裸」面對公眾，將來拍拖會低調進行，保留私隱。
「事業上，公司畀機會，都算係啱啱起步，所以結婚我真係未諗住。以前好抗拒搵圈中人拍拖，但現在會覺得圈中人也不錯，因為圈中人好了解我們的工作行業，例如我的工作時間，因為一入劇組我真係好冇時間。但我希望係可以低調，我都唔係好鍾意高調拍拖的人。圈外人要承受我好多新聞上的事，傳媒的事佢要面對。年齡上大我6、7年都OK，最緊要係大家溝通到。我唔需要大富大貴、超級大家族、大富豪，因為他們都有自己要面對的問題。」
考獲潛水牌
Kelly今次飾演水底攝影師，接到監製特別要求，以短髮造型亮相。為了演好角色，Kelly開拍前特意找潛水教練學習，更一潛上癮，考了潛水牌。劇中她跟吳岱融及李國麟都有父女情，更令Kelly想起兒時回憶。
「今次都畀咗好大勇氣去嘗試，自己未試過剪短頭髮。我要多謝監製，之前拍《張保仔》安排我學策騎，今次就要學潛水，自己都有再跟教練去學，都學到考牌。劇中我同岱融哥、李國麟有父女情，又同黃浩然有兄妹情。現實中我有一兄一弟，喺我11歲時，弟弟出世及家中發生了一些問題，令我之後嗰幾年影響都好大。劇中的父女情內心戲，令我回憶返自己嗰幾年發生的事情，去感受返。」