第一場、第五班、二二○○米。「幸運」系馬匹掌舵人梁啟徽，最具成就當然係養過一匹馬王「幸運馬主」，佢近季一直主打引入愛駒配種後所生子嗣來港，可惜此駒喺一四年因病離世，所以佢同囝囝名下「幸運馬王」同「幸運神威」都可以講係「幸運馬主」最後一批運港子嗣。不過今次出爭五班二千二百米「幸運神駒」，雖然並唔係出自「幸運馬主」，其實以同系馬在港令人失望表現，幕後嘗試不同貨源力求突破絕對合理。「幸運神駒」係偏向慢熱嘅長途馬，初期無表現屬幕後意料之內，果然落到五班三場得一季一第五，今次出戰長途賽事出擊心意昭然，有望為馬主破悶局。
第五場、第四班、一六五○米。「由心出發」已超過兩年未再贏過，而評分亦已回落至四班底，只要交回本身水準，論實力其實絕對夠爭。這駒近期主攻谷草一哩，看前仗角逐此程，無奈貼欄競跑下，在轉彎前遇上前領馬減慢步速，於是由貼欄五、六位一度退至尾列，而當馬群散開後才有空位再追上，結果僅負頭位只能嘆句時不與我，但可以肯定的是此匹六歲馬目前健康情況已穩定，今次捲土重來再攻強項，任何對手要贏都要先過牠這一關。