■千嬅與嘉賓梁漢文合唱吵架歌《滾》。香港文匯報訊 電影《春嬌救志明》票房節節上升，香港上畫兩日累積票房超過360萬港元，而內地前日開畫票房突破4615萬元人民幣，可喜可賀。前晚在廣州舉行「突然想起余春嬌唱遊會」的楊千嬅，得知票房成績一飛沖天，開心到與嘉賓梁漢文（Edmond）合唱時4度喪笑嗌停，搞到Edmond一度懷疑自己上了整蠱節目。
梁漢文與千嬅合唱時笑料百出，話說Edmond與千嬅合唱吵架歌《滾》，他叫千嬅一齊培養情緒，音樂準備響起，千嬅突然說：「其實我哋真係幾勁......」Edmond被擾亂情緒，千嬅即道歉轉個臉向觀眾說：「人哋唱情歌唱到開巷，我哋鬧交鬧到開巷，係咪勁先？」觀眾起哄大笑，情緒平伏後再唱，千嬅卻唱錯另一段歌詞，耍冧重唱。Edmond大方地說：「咁我可以再投入過！」樂手們又再準備起歌，豈料千嬅似被篤中笑穴，笑到標眼水。Edmond忍住笑，說：「我可以再再嚟過，使唔使畀個sportlight呀？」他刻意拉開話題希望千嬅盡快平伏笑意，但她卻笑到蹲在地上，Edmond無奈地對觀眾說：「你哋唔好再引佢笑，佢就嚟賴尿㗎啦！」
音樂又再響起，千嬅又叫停，她說：「到我未得呀！」Edmond反白眼：「其實係咪整蠱節目？你哋夾埋整蠱我？」千嬅邊笑邊解釋：「好似好尷尬，明明大家太開心......（你想大家點幫你投入返個情緒呢？）頭先講到好開心，突然要咁『行』去嗌交，我要冷靜吓先！（大家都幫緊你！）你唔好叫全場一齊嚟鬧我呀！」結果順利完成合唱。