■朱凱婷及女兒聯同媽媽預祝母親節。香港文匯報訊（記者 植植）朱凱婷昨日聯同5歲大的囡囡林穎彤齊以「親子裝」，於馬鞍山出席母親節活動，朱凱婷父母到場支持女兒及孫女，三代同堂場面溫馨。活動中，穎彤除咗同媽媽合唱容祖兒的《世上只有》外，仲向媽媽送上心心，穎彤更主動錫錫媽媽預祝母親節。說到兩母女首次同台合唱，朱凱婷說：「女兒在屋企有練歌。(會唔會畀佢入行做童星？)我唔會特別去諗，現在會同佢出席有意義的活動，但我希望佢讀好書先，不過有一日，個女同我講想參選港姐，我冇同佢提過，唔知點解佢會咁講，不過我同佢都定下規矩，起碼要大學畢業、心地好。(會畀穎彤去選港姐？)呢個年代，冇得唔畀，但我會解釋畀佢聽優點同缺點，不過佢暫時的志願係做醫生。」
母親節將至，穎彤表示當晚同爸爸一齊煮晚餐同整甜品，朱凱婷甜笑咁話：「上個禮拜，我拍完外景，個女打畀我話同爸爸喺街市買緊餸，返屋企同我打邊爐，有時工作完好攰，唔想出街，喺屋企可以休息下。」