■Pietro Boselli捉着麥明詩的手合力以咖啡豆砌畫。香港文匯報訊（記者 梁靜儀）麥明詩（Louisa）、梁詠琪(GiGi )、黎諾懿、廖碧兒、袁紫僑、莊思敏、鄧鉅明夫婦及被譽為「全球最靚仔數學教授」Pietro Boselli等，昨日到尖沙咀出席餐廳揭幕禮活動，大會安排Pietro Boselli化身船夫，接載坐着仿意大利的貢多拉車子的Louisa進場，二人又捉着手合力以咖啡豆砌畫。
近日忙於拍攝無綫劇集《跨世代》的麥明詩，近日被拍到與同劇的余德丞一杯雪糕兩份食？她解釋：「無咩嘢嘅！平時同朋友出街食飯都會一碟餸大家夾啦，我哋係有用公筷公匙，絕對唔會你一啖我一啖，咁係好唔衛生，係一早已經舀開，我咁fit冇理由食晒成杯雪糕㗎嘛！」報道又指她挨落男方心口？她笑說：「無計啦，係監製要佢質我個頭落佢心口度。（有冇聽到佢心跳加速？）我聽到佢心跳，個心係一定會跳嘅。（佢成日搞爛gag氹你笑？）佢平時都會搞吓笑，佢做主持轉數快，都有幽默感。」
問到可有發展機會？她肯定說：「我唔見到發展可能，唔係我個type，太大隻，你知我一向鍾意啲身材唔係好fit嘅，身材唔需要咁發達，最緊要個腦發達。（咁教授得唔得？）唔加分但唔會減分嘅，都要佢喺香港發展先得，異地戀好難維繫，佢嚟香港發展先詳談。」
梁詠琪計劃追多個
梁詠琪表示會提早跟媽咪慶祝母親節，因為她將會攜同女兒去新加坡探望剛誕下囝囝的好友楊采妮，一起慶祝母親節。問到可有預備禮物送給BB？GiGi透露禮物會以「環保」為主： 「會送個女嘅舊玩具同中性少少嘅衫，大家都明白小朋友好快就唔啱着，唔好浪費，我現在畀佢，第時我再生再畀返我。」GiGi不諱言有計劃追多個，但工作已排到十月，之後再計劃。GiGi又透露楊采妮好認真坐月，大家都會交流餵母乳心得，覺得做媽咪真的很偉大，她照顧一個小孩已覺得很累，何況對方要照顧兩個。她又稱有睇過BB相，覺得暫時似爸爸，肥嘟嘟好得意。
黎諾懿靠囝囝攞彩
黎諾懿日前拍片放上社交網站似向Pietro Boselli挑機，他解釋並非向對方挑機，只是趁拍攝節目空檔拍片玩，他說： 「本來無留意Pietro Boselli啲新聞，公關傳佢啲『肉照』畀我，好大隻，睇埋學歷又犀利，我諗佢讀多我一世書。」說到他有兒子「小春雞」勝對方？諾懿說：「對方有外國血統，啲人話佢同麥明詩有火花，如果佢同麥明詩真係生個混血應該好靚仔，可能贏『小春雞』，『小春雞』只係陀地雞，好彩暫時有『小春雞』頂到，如果唔係就輸晒，輸成條街。」問到母親節如何獎勵太太？諾懿才醒起昨日是「小春雞」滿月，但暫時不考慮擺滿月宴，可能一歲時才慶祝。
此外，賭王何鴻燊四太兒子何猷君女友袁紫僑（CoCo）與三太兒子猷啟女友Angelika N.同場，但CoCo卻拒與Angelika合照，她解釋因事前大會沒有講，及不想訪問焦點出來去了另一邊。另CoCo稱母親節要去上海，未能與男友媽咪食飯慶祝，或會買禮物送給對方。