蔡約翰馬房向來喜歡炮製多捷馬，今季也不例外，「翩翩」與「喜悅繽紛」各贏得五W，其次係「紅衣醒神」、「當家精選」、「秘密武器」同埋「西方快車」各四勝，能夠贏得三W就有五駒，分別係「爭分奪秒」、「魅力知友」、「首映」、「駿明珍寶」同埋「翔惑」，單係呢十一隻馬已帶來四十一場頭馬，亦即係講蔡廄近半數頭馬是來自呢十一匹馬身上，咪話唔犀利，唔怪得蔡神仙可以長期在港稱霸，所以呢個馬房啲質新馬幾時都要吼到實。好似今個周日賽事，呢個馬房又有數胡機會，當中以「爭分奪秒」同埋「勇闖者」最有冠軍相，先講隻「爭分奪秒」，季內七戰獲三冠三亞一季全上名成績，頭六場全跑田草千四米，以252總場次表現最亮眼，當時跟「勝得威」鬥足大半條直路，最終要影相分勝負而輸鼻位得亞軍，頭馬「勝得威」之後再增添兩冠一亞成績，包括最近喺一班賽擊敗「馬上發財」捧走麥蘊利盃，而喺252場次跑第三名嘅「喜旺寶」仲勁，之後合共取得四冠三亞成績，包括上周日摘下國際三級賽獅子山錦標，取得首項分級賽冠軍。由此推算「爭分奪秒」現時處身二班確實係着數到暈，加上有三個月休息時間，在季尾階段可以憑較佳體力制敵，相信要取得季內第四場頭馬冇乜難度。
另一匹王牌馬「勇闖者」亦係匹季內越跑越好賽駒，隻馬首回合安排在元旦日出戰田草千二米，當時在莫雷拉胯下只能跑得梗頸四而回，輸俾頭馬「錶之星」個半身位，之後冇耐就被驗出血液不正常，結果抖到五月初至再上陣，復出後易配田泰安兼除去眼罩再戰田草千二米，結果跟「靠眼光」鬥到以頸位之微分勝負而獲亞軍，表現突飛猛進；而隻馬相隔兩周再次由田泰安壓陣增程角逐千四米，結果再一次屈居亞軍，僅以半個身位不敵路程專家「瀟灑王子」，實非戰之罪。確認三歲馬狀態升火待發，相信喺今次四班半弱組已有條件叩響勝鼓。
第三匹有機會為蔡廄帶來頭馬係「飛霞」，呢匹前季來港澳洲PPG，頭兩季合共跑咗廿二場先至贏得一場頭馬咁大把，而今季初在五班連場只係跑近，總與頭馬擦肩而過，沒料到踏入三月中突然神勇，先贏場谷草千二米，前仗再喺泥地千二米取得季內第二捷，而且係孭一三三磅下大勝對手成四個幾馬位，足顯呢匹五歲馬現階段先至進入大熟期；上場升上四班輕描淡寫咁都跑得第五，相信是探路性質，汲取經驗後再戰分分鐘可攻陷四班關口。