潘明輝果然犀利，每次上陣都有馬贏，好似上周日賽事咁，又起個孖寶，先替葉楚航隻「海嵐一號」一放到底贏馬，然後再替師父隻「勝利仔」取勝，後者雖然有柏寶及祈普敦贏過，但賀賢有咗呢個寶貝徒弟，又點會將呢啲取分武器輕易咁俾人借艇割禾，點解話會俾人借艇割禾，道理好簡單，馬房如果有一隻弗馬，練馬師知道贏得外，騎師亦有權知道，假如大家同一陣線，咁都可以理解，但如果要靠外來騎師，咁即係話有機會隻弗馬會俾更多人知道，賠率好容易俾人買熱，不過如果騎練係同一路人馬咁就唔同，例如潘明輝騎番師父馬點都口密好多。
潘明輝剛周日替葉楚航贏隻「海嵐一號」，呢隻馬幕後話咗會光榮退役，即贏完上場之後打算運返澳洲頤養天年，所以話見習生跑得出色，上季就有個蔣嘉琦，今季有個潘明輝，話時話巫顯東都唔睇得小，佢替「獅子驄」贏取第五捷，佢係最大功臣。潘明輝今次夜賽又有唔少實力馬披甲，不妨搵佢作贏錢扶手棍，例如佢替霍利時披甲隻「越感」（圖4號），日前早上倉主安排「紅褲精神」副練及「越感」潘明輝於地堂拍踱，踱完後倉主要原庄人馬喺下午再到彭福公園踱步，仲要吩咐副練下午要等佢出現才可走到彭福公園踱步。果然，下午一早就見倉主蒲頭，跟埋呢兩隻馬到彭福公園，十分留意兩駒動態。「紅褲精神」上次由田泰安跑亞軍，只係輸頸位俾「多多勁驥」，今次可唔可以跑番水準，七歲馬真係好難估，但講真另外隻「越感」，上次由祈普敦贏「美妙星」取得季內第二W，今季喺三班贏兩場都唔使升班，着數程度可想而知，今次馬房用十磅仔潘明輝減磅跑，大有本錢贏得季內第三W。
樂有盈騎練睇教閘
睇睇潘明輝今次兩匹師父賀賢倉戰馬，「由心出色」及「樂有盈」。周一早上，賀賢經已安排「由心出色」及「樂有盈」喺地堂做早課，前者安排潘明輝踱，後者則由騎馬人劉家泰試，兩隻馬齊齊於地堂拍踱十餘分鐘，拍踱期間，兩隻馬都非常好火墜手，踱步完畢，又再進行教閘活動。「由心出色」初期上陣經常驚驚青青，宜家已經逐漸定番，狀態經已有進展，不過以目前水準尚未足以制敵。但另一隻「樂有盈」，只見劉家泰踱完之後，再教埋閘，期間潘明輝及賀賢金睛火眼睇到實一實。「樂有盈」今次係由文家良馬房轉到賀賢首次上陣，上季仲係隻三班馬，現時經已跌落到五班上陣，呢隻馬係咪差得咁緊要？大家就真係要睇埋今仗，排埋個有利二檔跑谷草一千米，大有機會替賀廄省招牌。
問鼎高峰路有專長
高伯新馬房之「問鼎高峰」，今季經已勝出三場。根據統計，在倉主替這駒轉跑谷草千二米之後，成績才突飛猛進，這駒總共跑過六次此程，除第一次跑得殿軍成績外，其餘五戰全入Q，成績是三冠兩亞，這亦是近五仗來所取得的佳績，今次馬房再度安排「問鼎高峰」出戰谷草千二米，配上手風大順的十磅仔潘明輝，是坐二望一之材。