今個馬季首度增至八十八次賽事，跑馬期間空檔所餘無幾，預計將來賽事日數不能再加，只向場次埋手，日賽十一場，夜賽九場情況在未來幾年會實行，始終馬會於今季開始增加了過百個自購新馬入口證，這批馬將在二○一八至一九年入口，既然增加了馬匹數目，都要增加場次令馬主有更多贏馬機會，這才公平，如果不是，多了馬主，但又沒有增加贏馬機會，豈不是只能白交養馬費。今個馬季還有不足一個月便煞科，據知下季開鑼日應是九月三日星期日，而煞科日應是下年的七月十四日，事實上如此漫長的馬季，今季尾開始，報名馬與過往相比已不算踴躍，就以有新馬賽的賽日為例，過往大都編排十一場，但今季跑新馬賽的日子未試過加場，不過將來增加馬匹入口數目，亦正好針對不夠馬跑的情況。今次賽事睇好文家良馬房的「小奇妙」，轉來窄場一哩列陣贏了一點級數，提防點石成金。