早已篤定成為今季練馬師冠軍嘅蔡約翰，上周日憑隻「澳斯卡」勝出國際三級賽精英盃，取得季內第九十二場頭馬，成功打破告東尼一季最多九十一場頭馬，呢個塵封咗接近十二年嘅紀錄，雖然蔡約翰今季大豐收，但睇蔡神仙在季尾階段仍然頻頻布下強陣，顯然沒有放軟手腳之意。
今周六香港共慶回歸賽馬日，安排上演三泥七草共十場日馬賽事，蔡神仙手馬依然夠惡，其中打王牌出戰二班草地千四米嘅「劍斷浪」（圖8號）贏面就最高，呢隻上年度澳洲周歲馬，短短兩季時間賽過十二仗已累積五勝兩位佳績，有超過五成半上名率，當中有三場頭馬是取自千四米途程，包括在今季296總場次以四分三身位擊敗「美麗傳承」；同埋上賽以個幾身位秒殺「恆駿寶駒」；今次休息個多月打王牌再戰勝途，蔡神仙對隻馬的機會分析說：「隻馬擁有高質，季初贏馬後狀態突然轉沉，仲要係越跑越差，幸好經過兩個月休息，隻馬能夠重拾角逐興趣，而且戰鬥力比之前仲提升唔少，其實前仗休後初出已有贏馬機會，但排咗個十四檔被迫要放棄早段留在較後位置，處境相當不利，再加上陣上連番受阻，先是在接近五百米處受阻無路可上，之後在最後四百米關鍵嘅時刻竟然塞咗成百幾二百米，雖然望空後立即追回不少失地，可惜為時已晚，只能姍姍來遲跑得第三名，所以上場檔位冇咁差，起步迅即跟在前列競跑，咁就輕易贏馬而回。而隻馬復課後狀態依然冇走樣，上周二由莫雷拉試課泥地千二米大閘，以輕鬆姿態跑得第二名，莫雷拉試完後表示對牠的進度相當滿意，預期牠今戰會有精采演出，大家可拭目以待。」
今年度三歲澳洲周歲馬「南方快車」，季內賽過兩戰均被捧成大熱門，結果首戰輸三個幾身位俾頭馬「嘉應小子」跑得第九名，上賽更是大敗跑包尾而回，今次休息逾半年始再上征途，蔡神仙表示：「隻馬質素唔曳，未能交出好成績，純粹是唔夠運而已，好似首戰咁，在陣上數度被困，尤其是喺直路上根本都冇乜點騎過；而上場於直路被他駒橫越跑線，結果要大力勒避，再加上賽後驗出氣管內有很多血，所以先至跑唔出應有水準，幸好隻馬經過一段長時間休息，進度相當理想，最近幾課大閘都試得好好，尤其是六月初由莫雷拉試谷草千二米大閘，由頭帶到尾輕鬆取勝，莫雷拉試完表示隻馬進步好大。我相信今場只要陣上不受擠碰，能夠發揮出應有水準嘅話，相信會有接近嘅演出。」