■《熱時》為乞金不停刷下限，玩埋低胸兔女郎､中坑着米妮裙同白雪公主衫，唔知一向勁重視版權嘅迪士尼會點諗。 fb截圖「熱狗」（「熱血公民」）為課金乜都肯制，女主持着吊帶睡裙表演玩火、男主持着淨底褲做意淫動作，已經超越咗絕大多數人嘅常識同底線，格調之low（低）就係令人冇眼睇。不過，所謂冤豬頭都有盲鼻菩薩，竟然《熱血時報》有節目近日都同到迪士尼合作，去幫手送電影飛。咁啱得咁蹺，《熱時》前晚又有一個網台節目俾人課金要求主持換造型做「特訓」，包括有男人着米妮裙同白雪公主衫，仲有低胸兔女郎添，唔知迪士尼見到點諗呢？ ■香港文匯報記者 甘瑜
《熱時》一眾主持為課金無所不用其極，幾年前一眾男主持「直播叫雞」，同金髮女郎玩到不亦樂乎，令唔少網民嘩然之餘都印象非常深刻。近日有關節目內容雖然已經刪咗，但仲有一眾主持近期繼續少布演出，又或者直播俾人狂質雪條棍落口等，已經俾網民揶揄，再咁落去真係直播食屎同裸跑都似。
中坑玩底褲扮女僕老少不宜
不過，正當咁樣嘅行為被社會主流唾棄嘅同時，《熱時》日前就推出咗「玩遊戲送戲飛」活動，聲言係同華特迪士尼（香港）有限公司合作，送出電影《打死不離3父女》優先場戲飛，但係佢哋同迪士尼一家大細、老少咸宜嘅形象好似爭好遠喎。
又唔知係攞景定贈慶，《熱時》前晚就有個「特別節目」， 話《實戰攻擋》搶佔《愚樂無窮》時段通宵特訓。點特訓？咪就係一班主持着住奇裝異服去做「體能動作」囉，其中有男主持拎住條底褲笑意盈盈咁做預告，最後仲玩到男主持着米妮嘅經典紅色白波點裙，又有男人着住迷你白雪公主套裝同扮女僕添。女主持都唔弱，低胸兔女郎服裝出場，個節目仲話「金主可以課金加插休息時間替代一組（體能動作），或者課金要求主持們更換造型」。唔知迪士尼見到佢哋咁做，仲惡搞埋迪士尼人物服裝，會唔會後悔呢？
形象只有更差 前「熱狗」鬧毒瘤
事實上，「熱狗」近年九唔搭八嘅節目內容，仲有佢哋所謂「體育救港」等等，都令人對呢個政團搲晒頭，再爆出「熱狗」主席蟲泰（鄭松泰）鬧市民白痴、話「青症雙邪」抵死，更係進一步令佢哋嘅形象跌破人類認知。日前中文大學學生會前會長周竪峰話要「本土派」、「自決派」合作，就提到「熱狗」已經自爆，人稱「滑鼠娘娘」、已離開「熱狗」嘅鄺頌晴亦乘機踩一腳話「呢班毒瘤一定要消失」，「『本土派』好多毒瘤--美其名攞資源實則自己侵吞窮奢極侈揮霍無度的人有之、只為爭取自己曝光留在鎂光燈下的人有之、利用身份食女食仔縱欲（慾）無度的人有之、只為威為型為疊馬的人有之、無能無才卻自視過高做齊上述之事的人有之......真係要大和解，一係就大家警惕自己努力改進認錯然後做好，一係就你自己消失，再唔係就大家淘汰你。」