姚子羚（Elaine）和陳山聰份屬好友，在劇集《同盟》中「奉旨」談情，山聰指兩人拍親熱戲沒難度，拍打戲挑戰更高。現實中，2人各有感情穩定、已到談婚論嫁的另一半，說起感情事，姚子羚談起男友鄭子邦一副甜絲絲的樣子，雙方也向結婚這個目標進發，希望可以行到最後。至於山聰近日被拍得買戒指，疑向拍拖3年的圈外女友Apple求婚，山聰自言已視女友為家人，也因為曾經離過婚，所以特別珍惜這段感情。
陳山聰今次在《同盟》一改奸角戲路，飾演「暖男」保護摯愛的母親與愛人，展現鐵漢柔情一面。山聰在劇中與好友姚子羚更有一段「羅密歐與茱麗葉」式淒美愛情，劇中他傾盡全力保護兩個心愛的女人。除了「打」，子羚和山聰在劇中不乏親熱鏡頭，當中幾場激吻戲，也變了網上熱話。姚子羚說：「我同山聰好似一對好兄弟、好姊妹，大家都好錫對方，好有默契，所以完全沒有尷尬，尷尬嗰個可能係導演。反而我覺得最搞笑就係咀完之後，大家的化妝黐晒在對方塊面上，如果NG，就要執返個妝先至可以再拍過。另外為了演好角色，於是自己在外找武術師傅學武打訓練，最難是怎樣在鏡頭上看上去好用力，但又不會打到人。」山聰則笑說：「以前的陳山聰一出來就是演奸角及二世祖，但今次監製Jazz(文偉鴻)安排我演『暖男』，有突破之餘，戲味都好重，好感謝Jazz給予機會及指導。」
姚子羚唔求獲獎
姚子羚於2015 年的《萬千星輝頒獎典禮》獲得最佳女配角後，本應順住個勢上位，然而卻因被愛犬咬傷破相而推劇停工養傷半年，《同盟》即為她康復後首套參與的劇集。身邊好姊妹胡定欣已成影后，問到子羚有沒有信心再次憑此劇獲獎？子羚坦言拍劇只為得到觀眾的認同。而子羚受傷期間，男友鄭子邦對其無微不至的照顧，十分甜入心。至於是否快將結婚，子羚表示雙方有此目標，但也希望傳媒高抬貴手，不要常去訪問男友，因為對方始終是圈外人。
「我好鍾意演戲，希望好似鮑姐（鮑起靜）咁，去到一個年紀，畀我享受天倫樂，又有權去選擇自己鍾意的戲去拍，所以就算結婚、生BB都唔會話唔工作，你見杏兒(胡杏兒)都是邊工作，邊大肚。拍呢個劇感受好深，因為當時休息了半年，再出來得唔得呢？自己那一刻都曾有一些疑問。幸好監製要求清晰，基本上按着要求照做就可以，因此都令自己十分放心。我又沒有特別去想獎項的事，如果這套劇能令我再上一層樓我會更加開心，但對我來說已是一份很好的禮物，最重要是得到觀眾的認同和喜愛。我最開心是聽到有觀眾同我講『好鍾意你個角色呀、覺得你打得好型呀、你同山聰好襯呀』，這已經是最大的得着。同埋我好明白大家好關心我幾時結婚，如果有好消息，希望會同大家分享，但也希望記者朋友唔好去跟佢，始終佢都不是呢個圈的人。」
陳山聰視女友為家人
日前踏入40歲的陳山聰被影到在尖沙咀首飾店揀鑽戒，報道指他睇中一隻價值15萬元的1卡半鑽戒，打算與拍拖3年多的圈外女友Apple求婚，並計劃明年初完成手上工作後，與女友到外地旅行結婚。對於和Apple的關係，山聰自言已視女友為家人，而同居也令雙方更了解。「大家工作太忙，我們已經是一齊住，見面時間真係唔多，要靠互相了解同體諒，有時我都有返去煮吓飯。最記得拍《同盟》時，我們剛搬屋，但因為忙拍劇，嗰3個月，我都很少回家瞓張床。有了上次的經歷(結婚離婚)，同居是真正互相了解的好機會，因為拍拖時好多生活細節你未必見到，要共同生活才知雙方習慣。現在大家感情似屋企人，有時我家人找不到我，都會找她。最開心係每次我演出佢都有睇，佢少出街，乜劇都會睇，佢睇完會畀意見我，提議我可以點做，又會指出缺點，唔會畀我一味只聽到好的聲音，咁樣會令人被蒙蔽。女友明白我係搏殺期，但大家早已肯定對方，又或者如果豹哥(單立文)宣佈生BB，我就宣佈結婚啦，哈哈！」