「雙學三丑」之中的黃之鋒和羅冠聰，在衝擊政總東翼前地案獲批准保釋等候上訴。兩人昨日出席電台訪問時大談獄中生活，但就似乎嫌監獄招呼不周，又不滿要兩個禮拜剪一次髮，又覺得監獄「冇驚喜」、所有嘢都好規律，只令人關注啲「細微嘢」。
不過，跌落地都要拿返揸沙，黃之鋒就話，自己坐監時收到好多信，包括有「藍絲」轉陣支持佢，所以坐監冇白費喎。
黃之鋒平時喺街頭「惡慣」，入到監獄以為仲喺街頭，「公民抗命」上身咁對住懲教職員都「質問」佢哋點解頭髮要兩個禮拜剪一次，仲要6mm長？會唔會放寬到1cm？但俾懲教職員警告唔好煽動其他囚友破壞監獄秩序。
網民譏坐監當去camp
羅冠聰就話監獄係一個絕無驚喜嘅地方，所有嘢都好有規律，令到原本的生活模式改變，同埋令人開始「學識」關注好細微嘅嘢：「譬如下一餐食乜嘢，下一期糧出幾多錢，有無足夠嘅錢買零食。」佢仲質疑懲教署「唔夠尊重」在囚者，認為政府之前宣傳講嘅接納同融入冇用。
對於兩人一放出嚟又係咁嘈，「Jay Lau」就批評：「做犯人都要尊嚴呀，放咗你啦不如，每星期比（畀）你三日去叫雞好無呀！每星期一日比（畀）你返屋企好無！低能狗，未被打已經比（畀）足尊嚴啦，×街！依（𠵱）家坐監呀，你當去camp呀，正傻仔。」
佢又批評羅所言嘅「細微嘢」：「你班友簡直是賤民！傻仔聰廢青天性表露出來，就係為食，為錢！買零食！」
不過，黃之鋒話自己坐監坐到有「藍絲」支持，就有唔少人附和，但係係曲線附和囉。「崔鎧韜」就揶揄︰「大罷（把）人未醒，再坐吓添（𠻹）。」「Carlton Wong」亦寸佢︰「咁你坐監坐到100%啲人都支持你，就一天光晒，你保釋出來干（幹）嗎？」「Ricky Leung」就質問︰「你條垃圾講得咁好！有人支持你過精彩嘅人生，自己又認咗罪，點解又要保釋出嚟上訴？」■香港文匯報記者 鄭治祖