上周日香港上演兩場國際二級賽，其中精英碗千二米，雷神坐騎「澳斯卡」閘前着啡格W落到三倍，但原來出擊主帥係廄侶「紅衣醒神」先真，呢匹馬雖然要負一三三磅，不過由雷神換上羅理雅威力竟然大增，入正直路大熱門「幸運如意」潘頓捐入內欄衝，相若位置嘅「紅衣醒神」就拉出外欄長驅直進，最後一百米騎者炒飯招式一出，隻馬彈住上嚟，結果隔三仗後呢匹五歲馬又再重開勝門，而且負頂磅造出一分八秒一，今季暫時同程最快時速，隻馬級數表露無遺，嚟緊十二月香港短途錦標本地代表又多一匹惡馬，至於是場跑第二、三、四名，就係「幸運如意」、「華恩庭」同「駿皇綵」。
另一場東方表行沙田錦標，十三匹上陣馬大摩佔六匹，陣勢嚇人，不過大熱門並唔係盃王嘅馬，而係告仔隻「美麗大師」，呢匹一哩王嘅位置更受到巨額過關投注影響，不過跑落呢匹大熱門就真係對大局冇乜影響，但威嘅依然都係息息相關嘅「美麗傳承」（圖前駒），呢匹馬上季先加入「美麗」系陣營，今季一出已喺梁家俊胯下捧走三級賽慶典盃，今場繼續升呢，原班人馬喺二級賽嘅沙田錦標再下一城，睇嚟已成功接棒成為「美麗」系衝擊大賽嘅棋子，人馬合作兩戰全勝，此場第二名係落到啡格嘅「喜旺寶」，盃王大摩包辦連贏而回，三、四名分別係「旌暉」同落飛嘅「勝得威」。
除香港之外其他地方亦有大賽舉行，當中日本京都競馬場日前上演日本三冠尾關，途程三千米大長途一級賽菊花賞。由於日本打吡冠軍「金之霸」未有參戰，形成群龍無首之局，意國型男杜滿萊策騎嘅Kiseki，早前於二級賽神戶新聞盃跑第二後，今場立即捧成四點五倍大熱門。雖然臨場刮起大風兼雨勢非常強勁，但Kiseki亦能克服難度，末段後上一攻而破，以兩馬位之先擊敗對手，順利贏出呢場一級賽。
至於北半球方面，經過早前英國冠軍錦標賽馬日，英國平地馬季已經結束，但法國仍有唔少大賽上演，上周日聖格盧馬場就舉行途程三千一百米一級賽皇家橡樹大賽。連贏兩屆呢項一級賽嘅「波斯小村」，今仗繼續由好拍檔蘇銘倫執韁，自然被捧成大熱門，可惜最後階段與湛明諾嘅坐騎Ice Breeze單打獨鬥之際，竟然率先力弱，只能飲恨跑第二，未能順利三連霸，而三歲嘅Ice Breeze繼早前揚威二級賽後，再次能力壓歐洲長途好手「波斯小村」贏出G1，前途認真無可限量也。