■孖靚靚拍「三級」片，鎮宇笑言怕整冧床。香港文匯報訊（記者 梁靜儀）吳鎮宇、古天樂(古仔)、袁詠儀（靚靚）、張達明、盧海鵬、江美儀及麥包等，昨日於觀塘出席邱禮濤執導的新片《家和萬事驚》開鏡儀式，戲中飾演鎮宇父親的達明，化上老妝後維妙維肖。
戲中鎮宇及靚靚飾演夫妻，二人相隔十多年後再合作，問到可有否親熱戲？靚靚笑說：「大把！唔係點解接呀？」鎮宇就搞笑說：「上好張床的螺絲，唔係就冧床！今次要加螺絲，呢部係『三級片』搞笑片，係三級好笑，係最好笑嗰個級別。」已好幾年沒有接拍電影的靚靚，表示好想再跟鎮宇合作，鎮宇即笑說：「個個女星同我合作完都食過翻尋味！」靚靚就答道：「係呀！我都『lam lam』脷。」
今次張達明有份當監製，鎮宇表示影片劇本是達明多年前的舞台劇劇本，曾得過很多獎項，是他提議達明將劇本拍成電影及飾演其父親，故事是講房屋問題及很多城市病。他又謂很多朋友都想達明返出來拍戲：「達明見到角色要坐輪椅就答應演出，佢對幕前演出濃厚過幕後，一直覺得自己係小生，（可想達明憑該片得獎？）可以攞劇本獎。」
力撐達明的鎮宇與靚靚，被問到片酬是否收取「友情價」？靚靚坦言收正常價。鎮宇則笑說：「達明做監製啫，又唔係投資，搵得達明做監製即證明係有好多錢，我好忙的，百忙中畀到期偷笑啦，仲要減片酬講唔過去，你話係達明復出或者最後一部戲，即刻碌到幾多人情卡，好多人客串。」
達明花兩小時化老妝
身兼監製及編劇的達明化上老妝拍攝，表示單是化妝便要用上兩小時，拍完後又要用熱毛巾敷溶面上的膠水才能落妝，不過頸紋是真的，不用化妝。他表示這次是鼻咽癌病情受控制後首次演重要角色，原本他不想演出，但今次是他首次跟古仔合作，加上戲中他的角色要坐輪椅演出，正好適合手腳麻痹的他，他笑說: 「遲早都要坐輪椅，試吓先，今次見到古仔又有人工??，好開心。」他指其角色當年舞台劇版本是由一名女演員反串飾演，並贏得舞台劇最佳女配角，問到他可有信心憑此角色得獎？達明說：「要睇古仔帶住我行，有幾場戲古仔好勁，講我同鎮宇、靚靚一家人嚇佢，點知畀佢嚇返轉頭，又有場戲古仔要喊，令我們好感動。」
古仔指影片是黑色幽默，反映現實，他覺得電影是要不同題材的。問到今次是否很有發揮？他說：「同達明合作已好大發揮。」問到他可有感情線？古仔笑謂要同藝術品合作拍攝，沒有感情線。