■唐文龍相信憑堅毅與自信，終有一天，有所成就。暌違香港電視熒光幕10年的唐文龍（Michael），近日憑與人妻陳敏之在台慶劇《溏心風暴3》連場肉搏激咀戲而備受注目。回內地發展超過十年，唐文龍見證港星從十分搶手，到現在光輝前景不在。Michael勸告現在想北上搵食的藝人，真的先要好好裝備自己才能被人賞識。像48歲的他不時大騷一排6嚿朱古力腹肌，唐文龍就是相信，憑堅毅與自信，終有一天，有所成就。■採、攝：植毅儀／場地: Mad for Garlic
十年前唐文龍離開無綫，決心北上內地發展。今次回巢拍劇，唐文龍憑《溏心風暴3》出軌人夫鄭立安捱出頭，同人妻陳敏之演的黃以愛的不倫戀，連場激戰頓成劇集唯一焦點與睇頭，睇到觀眾火起，於網上齊聲討這對「狗男女」!
「鄭立安一角對我是好大挑戰，算係一個亦正亦邪的角色。因人物有婚外情富爭議性，一般演員都會迴避，但我覺得無所謂，因演戲不一定要常做忠角好人，亦正亦邪也是演戲，只要角色係有變壞的原因，所以我不做反派誰做反派呢？作為演員，有時做好人角色好悶，因為無嘢發生，所有嘢都係你去補救，無需要出錯，但做壞人或者反派，好多事件，令到你喺故事中出錯，咁先係生活，有真實感同埋有追看性。其實近兩三年，珍姐都有搵我拍劇，只因自己檔期不合而未成事，公司如有任何需要，我的大門是隨時開放，大家就唔好用回巢呢個字眼了。今次個角色爆出，只因現實真係有好多呢種人，背住太太受不住出面的引誘，好有真實感。」
從不跟女演員傳緋聞
唐文龍1994年於香港以歌手身份出道，推出首張專輯。其後於台灣推出華語唱片。之後簽約無綫電視，拍攝多套電視劇，多數擔任第二、三男主角。2005年約滿後離開。入行24年，基本上唐文龍從未同女演員傳出過緋聞，又甚少被傳媒影到佢拍拖，因此近年甚至有暗示佢是「基」的。
「你又講得真係好對，我真係未試過同女對手傳緋聞，以前拍戲、拍劇，拍完就算，從來沒有聯絡，因為當時有女朋友，唔想女方誤會。自己又唔鍾意出去飲嘢，好唔自在，寧願一個人喺健身室，做健身。今次算有進步，我有車過敏之的，也有佢電話。話說開拍前，佢主動找朋友取得我的電話號碼，開始溝通傾劇本。因為我們互相陌生，處理好親密的戲、感情上的糾結場面，是有一定壓力，但卻可以給新鮮感予對方及觀眾。因估唔到她會做什麼反應，火花更大。」
怨狗仔隊破壞約會
既然唐文龍主動提起女朋友，記者打蛇隨棍上，問起其「斷背」的傳聞。唐文龍直言現在沒有拍拖，都會想拍拖結婚，但遇到緣分比找工作更有難度，事業可以靠努力，但緣分不是努力就有收穫。唐文龍仲埋怨香港的狗仔隊破壞其好事，只因去年約了一個心儀女性外出食飯可惜被記者影到，嚇怕女方，令未開花的情緣，立即終止。
「我好肯定話畀你知，我一定係鍾意女人，仲要係非常之鍾意嗰隻。在內地工作時有女朋友，惜最後未能開花結果。自己工作圈子細，又是一個宅男，更加難認識女仔。或者我不介意相睇，條件OK就可以。有時覺得搵個人可以與自己一生一世係好難的，人生際遇好有趣，遇到一個喜歡的人未必能結識，又或對方已心有所屬。擇偶條件當然是樣靚身材正，這是男人的通病，不過最重要是能夠溝通，最好懂英文，因為我的家人都在外國。」
內地發展先裝備自己
知道Michael有6嚿朱古力腹肌，只因去年看了陳嘉上執導的《蕩寇風雲》。其中有一幕，他和洪天明等露出上半身在沙灘練跑，真的睇到人嘩嘩聲。近年是合拍電影的常客，拜香港九十年代電視劇餘威所賜，南方觀眾對唐文龍有一定程度認識，最初常兩地飛，最後還是要隨大環境北移，在北京定居，一住十年。
「在北京苦學普通話，學飲酒識朋友，終於闖出一片天。本身我有武術底子，拜師洪拳師父劉家榮和張義強，在內地拍過不少古裝電視劇，也被選中拍荷里活片，在奇洛李維斯首次執導的《太極俠》中演出。在北京發展時自己已經四十三歲，算係建立咗少少基礎。咁多年一直都有諗過轉行，我諗大概有一萬次。不過從來冇真正下定決心，因為不甘心，就是相信，憑堅毅與自信，終有一天，有所成就。最重要係相信自己可以做到。但呢幾年在內地睇到內地電影、電視業高速發展，人人以為機會好多，但沒有實力，真係企唔到陣腳，因為內地比你叻的人更多，如果你想返去發展，先好好裝備自己，只因機會唔等人，唔係有好多個陳偉霆可以彈得出。」