話就話要搞個所謂「初選」去團結力量，但反對派搞完「初選」之後就反而更加分裂。話說九龍西嘅初選�哋揀咗蟲炎（姚松炎）出嚟，而排名第二成為Plan B嘅就係民協老馮（馮檢基），而（𠵱）家一班人驚蟲炎入唔到閘，又想反口，最新做法係「民主動力」又另外整個民調，然後「發現」老馮支持度唔夠排名第三嘅民主黨袁海文高喎，咁樣講，即係佢哋個「初選」係流㗎啦。流定堅都唔緊要啦，總之「民主動力」就安排咗過幾日召開持份者會議，確定「最新安排」喎。唔少人見到咁都由憎老馮變到同情老馮，逐漸開口鬧大台唔民主，唔少人仲建議老馮照出選同佢哋攬炒添，今鋪真係迫到自己友跳反啦。
民調：寧支持袁海文
雖然「民主動力」搞「初選」時講到自己個機制幾咁縝密完善，但Plan B唔啱自己心水，就想自行推翻結果。日前有息消就話，「民主動力」委託咗向來幫開反對派大台做民調嘅「港大民研」去做電話調查，「發現」有超過三成受訪者覺得，如果蟲炎出唔到選，就會寧願支持袁海文，而唔撐老馮喎。
近日反對派都亂晒陣腳，為咗踩死老馮，嗰頭搬埋公民黨元老梁家傑出嚟，放風話由佢做Plan B，呢頭「自決派」立法會議員朱凱廸又開始喺facebook出長文幫手「辯解」，話其實訂立「初選」機制嘅人，本身都好難預知形勢，而老馮又同蟲炎有咁大差距，所以大家先覺得「有需要按選舉結果討論Plan B人選，不能『鐵板一塊』。」唔守信用都講得咁冠冕堂皇，真係一種境界。
朱凱廸：要考慮勝算
朱凱廸仲話，唔可以只係「跟機制」去行事，仲要考慮勝算，仲話「民主動力」安排咗過幾日持份者會議，確定「最新安排」，佢自己亦都有周圍去「溝通」咁話。
講到咁霸道，自己友都頂佢唔順。教協總幹事馮家強噚日就轉載朱凱廸篇文，並講道︰「一般而言，一場『初選』完結，我們應該按照『初選』結果，整合所屬政黨和組織的力量，說服和爭取『初選』輸了的政黨支持，去打正式的選戰，尋求最終的勝利。這是整合的過程。但有人，會反過來利用多數的民意，壓倒少數的民意，迫令輸了的政黨和組織就範，甚至不惜扭曲既定的制度。這是民粹。這是分裂的過程。後者的典型例子？Donald Trump（美國總統特朗普）囉。」
馮家強其實前日已經寸緊朱凱廸，出文質問「關朱凱廸咩事？」再講到︰「身為民主派一員，我也想參加下（本）周的討論，可以嗎？如果其他人不可以參加，為何朱凱廸可以？」
民主黨副主席羅健熙亦出文開火，質問︰「點解會有人有信心推翻原本制度？其中一個原因，係若佢地（哋）成功逼走阿基，佢都睇死你班傳統民主派最後都係『大局為重』焗撐新推出嚟嗰個。講咗一萬次，呢個世界唔想團結既（嘅）人總係破壞團結，然後再喺適合既（嘅）時候就會叫你團結。究竟阿基趕客啲，定唔尊重機制既（嘅）人趕客啲？人生第一次，攬炒既（嘅）念頭喺我腦海閃過。」 ■香港文匯報記者 甘瑜