今晚谷草安排八場送歲馬，以B欄C彎跑道進行，頭場晚上七時十五分開跑，全晚並冇盃賽編排。練馬師方面，羅富全、蘇保羅及葉楚航皆派出不少實力馬參戰，可以優先留意。騎師方面，雷神、潘頓及羅理雅均手執多匹惡馬，可作為扶手棍，另外巫顯東之坐騎也不弱，值得一吼。
第一場、第五班、一八○○米。「富貴榮華」文家良九歲老黃忠，上季尾喺谷草二千二勝回一W，而今季跑過六仗，第二回合喺谷草千八殺入大冷Q，打後四戰雖不上名，然而最近兩戰谷草一哩及千八，拉士卻追回不少失地而輸近；今次乘勇再爭同程，屆時如有分頭值得扒冷門。
勝將臨門再下一城
第二場、第五班、一二○○米。「勝將臨門」羅富全馬房V布馬，今季轉投此廄先後三戰，首兩仗出戰谷草一千及泥地千二皆無功而回；上仗用潘頓操刀轉戰窄場千二，排八檔起步騎者途中刻意留後，待拉士二百才打衝鋒一攻而破，以四分三馬位壓倒「神寶金剛」開齋；復課所見成熟更進，今戰瞄準勝途有力再捷。
第三場、第四班、一六五○米。「華美之寶」至今兩捷谷草一哩賽，乃最佳射程，季內跑至第三仗喺四班同程叩響勝鼓，打後兩戰表現卻走樣，當中一役錯在貝湯美走位欠佳所致，落敗不可作準；其後再跑三仗獲一季兩殿軍；而今回師谷賽一哩，同場放頭馬為數不多，以本身排五檔配七磅仔巫顯東，憑牠前速銳利，如果早段積極搶位，居此贏馬應綽綽有餘，可還以顏色。
第四場、第四班、一二○○米。「大四喜」上季兩歲時在新馬賽兩度上名，難免惹人無限憧憬，惟今季轉三歲礙於進度緩慢，馬房在部署上也不欲揠苗助長，初期表現平常可予理解，然而經過一輪寓賽代操，直到前仗出戰谷草千二米終於有接近走勢；上仗七日後匆戰再跑第二；今番加操續攻此程，看來已屆收成時候。
第五場、第四班、一六五○米。「咪走寶」何良馬房質新之輩，前次由谷草一千米大幅增程至一哩，事前沒有任何中距離實戰經驗，最終竟可一放到底，輕勝亞軍「天意」三乘許，表現超乎想像，事後看來牠的中程實力非同凡響；上次續爭此程，對手多似是而非之流，在東仔自造步速下輕易再下一城；拚後加八分仍留四班，交出水準在此三捷呼聲高唱。
第六場、第三班、一○○○米。「電子群英」今季成績穩步穩紮，六場賽事取得兩冠兩亞一季一第五成績，全數角逐谷草一千及千二米取得，再看上賽加至八十四分角逐二班千二，喺貝湯美胯下均速擺前走跑入大冷位；今次降三班跑窄場一千米，對手比起上賽為弱，有望衝擊季內第三W。
第七場、第三班、一二○○米。「鞍歌」季內兩戰，初出田草直路賽表現十分失望，快跟兩段之後，最後一程嚴重力弱，敗因難明，然而復課進度起得好好，而在出試一千米谷閘走過步姿齊整，故此上仗渡江跑一千即獲第三；復課所見神色集中，狀態仍在作戰水準，今次轉戰千二有力拚勝。
劍聶風磨利顯鋒芒
第八場、第三班、一六五○米。「劍聶風」今季共上陣七次，首仗角逐泥地一哩跑來一無是處，相信是用作熱身開氣性質；經此一役便埋首專攻谷草一哩，五戰得一冠兩亞一季一第五；上仗跑番泥地一哩又再招敗績，由此可見今次復爭窄場一哩捲土重來，隨時可打翻身仗。