上周六賽事排位日早上，先有「加州縱堅」、「家樂駿駒」、「宇宙車神」就不同健康理由退出，再有徐雨石一對「勁嘉輝」及「旅遊拿督」分別因食慾不振及左前腿不良於行而退下火線，賽後食慾不振情況比較抽象，吃少一點或不肯進食都可歸納同類，馬匹不良於行也有不同程度，退出都屬於無可厚非，但當有些馬一心報名，志在取得保護權，偏偏又被列為正選，戰意難免打個折扣，雖然無心插柳柳成蔭個案，馬迷也非沒見過，以往好些勝出，練馬師也直言報名之時，並非真正箭頭所在，最簡單道理，有上陣便有機會贏馬，問題是這類馬匹，恐怕三甲不入遠比有表現為多。
另一邊廂，仲記唔記得上季有一輪陣中頻頻有意外發生，史卓豐策「翡翠紅星」及李寶利與黃皓楠「飛皇騰達」及「正先生」雙雙墮馬受傷前後，羅理雅騎「飛鶯」跌馬，尾隨「好醒」及「魅力之子」收掣不及炒埋一碟，何澤堯及田泰安同時被摔下，羅理雅右肩膊移位，另右腳踝有輕微裂紋，休息長達幾個月。到季尾楊明綸騎「勝利日」撞欄墮馬，蘇狄雄策「軍勇戰略」在後面被波及，前者休息一個賽日即可復賽，但蘇狄雄右肩受傷一直至今仍未復出。今季初策騎「育成寶貝」墮馬的黎海榮，今季肯定騎唔到，據知蘇狄雄九成九都一樣，如果可提早復課已算本事。蘇狄雄該次大鑊到右肩碎裂，經過差不多八個月養傷，據知連日常生活用力都有影響。行船跑馬有起事嚟可大可小，將心比己，寧可忍痛重跨馬背，還是置安全於不顧，筆者只知輸錢可以搵番，生命輸不得，唔係嘩眾取寵及婦人之仁，騎師個個身經百戰，話就話少少苦楚等於激勵，而且鬥心超強係佢哋特質，但心理創傷，就唔係個個都頂得住，更何況醫生證明係真傷，希望蘇狄雄咪理咁多，健康係自己嘅，來日方長，千祈唔好勉為其難。