第六場､第三班､一六五○米。「慣勝共贏」今季轉投羅富全馬房後表現進步，跑過六戰取得一冠兩亞軍成績，上名俱在谷草一哩；看日前試千二米泥閘，起步唔快留守後疊，入彎輕騎下反應不俗，逐步追趕後上第五，狀態持續勇銳，今晚練者卻揀泥地一哩再起風雲，兼夾改配黃皓楠減磅出拚，提防冷門反底。
第七場､第二班､一二○○米。「駿明珍寶」蔡廄當打短途佳駟，迄今已累積七冠五亞從未跑過季軍，再看前仗配杜利萊角逐田草千二，後上爆出十倍冷W；上賽渡江出戰千二跑第五，走勢點到即止；復課所見力度十足，精神奕奕，今仗改配兩騎非冠即亞嘅潘頓操刀，半冷在此。
第八場､第三班､一二○○米。「幻影飛鷹」今季出賽七次跑獲一冠三亞一殿，目下評六十四分仍有上升水位，今晚續攻泥地千二，練者搵到雷神掛帥配搭用到最強，又抽埋一檔，搏殺萬事俱備，只要起步快閘貼欄搶出，當有力食番鋪尾糊。