■羅力威和雨僑前晚在珍寶海鮮舫筵開16席。香港文匯報訊 羅力威和雨僑前日舉行婚禮，兩人中午在淺水灣進行註冊儀式，並與親友、同事、同學及圈中友好等共進西式午餐後，晚上則到珍寶海鮮舫筵開16席，宴請雙方家人、至親及長輩。
由於一對新人在婚禮前沒有接新娘等儀式，因此晚宴雖一切從簡，但二人亦有向雙方家長及長輩斟茶，進行簡單的傳統習俗。簡約熱鬧的家族晚宴，令兩方長輩很滿意，但原來所有婚禮晚宴事宜，由羅力威一手包辦，難怪雨僑不停讚老公叻仔。阿僑說：「我覺得我老公好叻，噚日由場地咁精彩嘅佈置到 rundown，到所有每一個細節、車嘅安排、seating plan 全部係我老公做晒，我真係個人到就得，所以我係瞓得最好，反而我老公瞓唔着，一早就安排車物資去現場。我係好開心嘅，見到好多圈中朋友，陳嘉桓搶到花球，Dominic（何浩文）又做兄弟，同埋我件婚紗成40磅重，Kev（婚紗設計師）真係日以繼夜做件婚紗畀我，我好感謝佢。」
錯食羅的「鎮山之寶」
最搞笑是經過婚禮之後，雨僑終可在阿威面前證實到她的「身份」，她笑說：「我同我老公一路都有個笑話，就係大家對對方嘅過去都成疑，我哋識嘅時候都廿幾歲，佢成日話『你係咪真係有讀大學㗎？唔見你啲同學嘅？你係咪籃球隊㗎？咩合唱團全部都唔見有』、又冇相，到噚日啲舊同學嚟晒，我就可以證實到我身份啦，佢唔係娶到個特務，但我對於我老公嘅身世仲係成謎，因為佢話長大喺新西蘭，我仲係冇見過佢任何一個同學同老師。」
晚宴結束後，一對新人回家後竟發生撈亂鮑魚事件，阿威說：「噚晚發生咗段小插曲，夜晚兩、三點返到屋企好肚餓，阿僑煮個麵畀我食，諗住簡簡單單開罐平鮑魚，煮完出嚟原來開咗我罐『鎮山之寶』，因為個鮑魚好大隻，我哋兩個又食唔晒，跟住佢覺得自己好似做錯事，喊住食個鮑魚公仔麵。好搞笑呀，全日大家都開開心心，估唔到夜晚喊住瞓。」
阿僑則無奈表示他倆要整個星期都要食那隻鮑魚。