大摩（圖右二）馬房今季成績回落，不過憑住「美麗傳承」喺香港一哩錦標同女皇銀禧紀念盃兩項國際一級賽嘅出色表現，獎金方面依然喺練馬師之中排前列，「美麗傳承」如果繼續保持水準，馬王寶座都唔係冇得同「馬克羅斯」鍊過。美麗系掌舵人郭少明早前就喺慶功宴上透露，此駒將會出戰周日嘅二級賽主席錦標，而終極目標當然係冠軍一哩賽。大摩透露今年冇派馬去杜拜真係有少少可惜，但佢知道今年新加坡復辦克蘭芝一哩賽，將會邀請外隊馬參戰。雖然未知有關詳細安排，但佢都幾鍾意遠征新加坡，一來機程唔長，二來當地天氣、環境都同香港接近，馬匹會較容易適應。所以如果有機會的話，都會考慮派「美麗傳承」出征當地，當然一切仍要睇馬主意願。至於將會喺周日出戰嘅「喜蓮獎星」同「新力風」，練者原本邀得布文（圖右一）來港為兩駒主轡，之但係布文早排策「表演者」驚險落樓兼出現腦震盪，雖然成功喺金拖鞋大賽日復出，兼且憑「雲絲仙子」及「白銀」起孖贏咗兩場一級賽，看似擺脫了傷患，但係騎者近日經醫生檢查，認為上次嘅腦震盪仲有啲手尾，因此要佢抖多一段時間先可以再策騎，極有可能要等到四月中，其實今次再傷，對布文影響甚大，所以「喜蓮獎星」同「新力風」睇嚟又要換人喇。