■男粉絲走近胡琳索取簽名兼合照。香港文匯報訊（記者 植植）「靚聲天后」胡琳（Bianca）最新專輯《Moments》昨日正式面世，她一大早跑到太古城買碟取個好意頭，其間巧遇一男一女粉絲前來掃貨，並走近偶像欲索取簽名兼合照，親民的Bianca當然有求必應，男粉絲隨即高呼：「我真係好幸運呀！要買六合彩。」
Bianca透露新專輯共錄製了11首全新廣東歌，笑言此舉屬「可持續發展」：「今次都放咗好多自己嘅創作出嚟，包括5首自己作曲同兩首填詞作品，令新碟更有自己想法、更個人化一啲，希望打後每做一隻碟都可以令人更加了解我嘅內心世界。」新專輯包羅淒美與跳脫曲風，除愛情外，還加入友情、寵物情緣等元素，藉歌曲記錄她人生中每個特別的moments。提到會否入多點貨送給親友？Bianca笑道：「會叫朋友支持，我覺得無論出碟定開演唱會都好，最緊要係自己鍾意聽先好嚟買或者嚟聽，唔好為咗撐場而逼啲朋友去聽自己唔鍾意嘅嘢，咁好冇道德呀！啲咁冇道德嘅嘢我唔會做，哈哈！希望鍾意我嘅人會自行嚟撐，我都撐咗自己嚟攞個好意頭，攞個頭彩啦！」