■許靖韻一向唱功了得。香港文匯報訊（記者 植植）由黃子韜(Tao)擔任發起人的《創造101》，日前正式開播。《創造101》打着由韓國Mnet《Produce 101》正式授權，開播前就因參賽者包含多位已出道女團成員，例如韓團宇宙少女的中國成員宣儀和美岐、香港代表許靖韻（Angela）、台灣Popu Lady宇珊和寶兒、曾在JYP娛樂練習的台灣歌手Kimberly陳芳語和3unshine成員等備受討論。多位已出道成員和一眾練習生，一同爭奪2次出道的機會。而一向唱功了得的Angela不單獲黃子韜在節目中親身教跳舞，最後更晉身A班，認真威!
許靖韻今次係唯一一個代表香港出戰的女歌手。第一集係根據呢一百零一個女生的「天才表演」而分班，唔使問A班當然係最好。而Angela就揀咗自彈自唱Bruno Mars的《When I Was Your Man》。
小豬被靚聲「嚇親」
出場後，Angela先介紹自己，然後就坐低自彈自唱。可能好多人包括導師在內，都覺得自彈自唱冇乜特色，點知佢一開口就引起全場哄動。除咗一眾參賽的女生，就連表現冷靜的導師們都露出讚嘆神色，而原本神情輕鬆的導師小豬（羅志祥），即刻連笑容都僵硬咗，原來係因為畀Angela把聲「嚇親」，導師之一的張杰忍唔住話：「唱得很好，彈得也很好，我覺得你全身都在呼吸。」韓國男團EXO前成員黃子韜係節目製作人，佢問Angela點解參加呢個比賽，Angela就話：「自己在跳舞方面其實是挺弱，看到這個比賽，就很想在這個比賽中成長，克服跳舞這東西，然後愛上跳舞。」佢再問Angela識唔識跳舞，然後叫佢跟住跳。在黃子韜親自鼓勵及教導下，Angela跳咗一小段。之後，小豬就忍唔住幫口：「你看一個女孩子穿這樣，然後blahblahblah，來！come on！」
最後，憑着細膩的感情同成熟的演繹，Angela成功晉身A班，而且仲創咗當晚最快拎到A級的選手！好威呀！