今天是一年一度的母親節，不少孝順仔、孝順女當然要趁機慰勞吓偉大的媽媽啦。處處頌讚媽媽好，已是2子之母的陳倩揚今年母親節收到份大禮，就是如願佗女。而倩揚也因佗女變成貪靚媽媽，買下不少大肚裙。倩揚懷着感恩的心，迎接BB出世! 採訪：植毅儀 ／攝影：劉國權／場地：Harlan's (The ONE)
現年34 歲的2008年香港小姐亞軍陳倩揚與丈夫陳浩然結婚7 年，育有分別6歲及3歲的兒子陳羲廷及陳羲穎，早前宣佈懷第3 胎喜訊，預產期7月，將迎接第3位家庭成員。將於暑假生BB的倩揚，早前宣佈佗B女。懷第三胎的倩揚，開心分享今次佗女心情。倩揚坦言今胎是計劃之中，因與老公鍾意熱鬧大家庭，仲唔排除生完呢胎，繼續再生。「今次佗女真是最好的母親節禮物，今胎是計劃之中，因與老公鍾意熱鬧大家庭，所以結婚的時候，已同老公都有共識，至少生兩個。」
造人一擊即中
早已是2子之母，陳倩揚今次佗女特別容光煥發，明艷照人。倩揚自爆自己今胎也變得貪靚，故買下不少靚靚大肚裙，去影相留倩影。「現在大仔6歲，二仔也將近3歲，今次懷孕是在計劃之內『開工』造人，也算是一擊即中。懷孕初期，我同媽媽去旅行，媽媽話我睇落唔同咗，問我係咪有咗BB，我當時仲話未有BB，點知旅行回港後，我再check，就確實自己有咗BB。仔定女對我們來講真係冇所謂，最緊要一切正常、健康。生女係大家都好期望發生的結果，成件事就會好圓滿，我同老公都好感恩。今次佗女，我頭3個月孕吐都不算嚴重，但始終自己已經34 歲，知道懷孕後都做咗好多檢查，以確保BB一切健康。可能今次佗妹妹，自己變得好貪靚，可能之前佗仔時比較少打扮，今次扮返夠本，買了好多條靚靚大肚婆裙，以備工作同影相做訪問都靚樣示人。」
兩子不呷妹醋
陳倩揚身邊不少朋友都已經有第二胎，也常聽友人呻再次懷孕，家中首名小朋友會變得呷醋，常常怕BB出世後，會霸住媽媽，會變得情緒反常。問到倩揚可有此煩惱？她表示兩個囝囝已知道屋企將會有新成員，而細佬(羲穎)好搞笑，要自己唔好叫佢細佬，因為已經係哥哥。當倩揚嗌哥哥(大仔羲廷)時，細佬會問倩揚嗌邊個，日日都好多笑料。
倩揚說：「預計暑假會坐月，現時我會把握時間陪兒子，怕生完之後，他們會覺得被冷落。有時我都要小心啲，因為佢好熱情，又話聽到『Bulu Bulu』聲。而我每日返家，哥哥、細佬都會爭住攬我，好得意。現在7個多月，開始洗衫、洗奶樽，他們會幫手，細佬反應特別大，始終哥哥之前已經歷過一次，細佬話要幫手餵奶同換片，細佬好Sweet，朝早一瞓醒擘大眼就嗌『BB、BB』，仲會伏喺我肚度。」倩揚又爆兩個囝囝每日爭住送抱，親近肚裡的妹妹，Sweet到爆！
