R&F富力（香港）足球隊主教練楊正光
不經不覺世界盃已嚟到最後一輪分組賽，今屆到現時為止我覺得可觀性幾高，可以話夠驚喜，夠刺激，好似強如德國同巴西要去補時一刻先可以贏波。而好多人都關心嘅阿根廷，以為已可以訂定機票回國，但原來命不該絕，仲有一線生機。屬於黑馬分子嘅克羅地亞亦有平穩嘅表現，但要數到今屆表現較出色嘅一定係英格蘭同比利時，比利時頭兩場都以大比數贏波，而英格蘭亦顯示出勁旅嘅本色，但始終兩隊喺頭兩場比賽都未受到太大考驗，好期待兩隊晉級之後嘅演出，相信去到16強嘅賽事一定更加緊張刺激。
講到今晚和凌晨C組及D組最後一輪嘅比賽，C組只有丹麥同澳洲之爭，但有4分在手嘅丹麥面對已篤定出線嘅法國，要晉級應該冇咩難度，因為只要和波就可以次名出線，同時相信法國主教練迪甘斯亦會畀機會較少踢嘅球員出場，等主力球員休息吓，準備16強嘅硬仗。
D組情況較為緊湊，除克羅地亞外，其餘3支球隊都有機會出線，當然我個人希望阿根廷能夠晉級，除因為多一支傳統勁旅殺入16強，增加可觀性外，亦因為今屆可能係美斯最後一屆嘅世界盃，希望佢嘅路可以走得更遠。雖然佢哋今屆表現令人失望，但今仗面對表現飄忽嘅尼日利亞，如發揮到本身水準，相信可創造一次奇蹟。