去到季尾階段，好多冠軍名銜之爭都鬥得非常激烈，當然除咗冠軍練馬師呢個獎篤定由蔡約翰攞之外，其餘乜都有得爭，冠軍騎師之爭，現時潘頓仲贏緊雷神五場頭馬，潘頓可唔可以頂到季尾，真係要睇埋呢幾次賽事。不過，另一個比賽，最受歡迎騎師則由雷神暫時領先，現時有51%支持度，至於第二位係潘頓，則有31%，仲有一個獎嘅競爭亦非常激烈，呢個就係告東尼獎，目前梁家俊與潘明輝頭馬數字都非常接近，上次日賽，潘明輝起個孖寶，頭馬數字增至31場，梁家俊好彩都爆隻「藍天堡馬」，目前有34場頭馬，兩者相距三場頭馬，拉士呢幾日，睇吓潘明輝點樣追法。
梁家俊與潘明輝呢兩位港產小將，嚟緊暑期都各有打算，兩個都有計劃保持身手，繼續出外策騎上陣，梁家俊話明煞料後翌日即飛往法國，替費伯華呢位多屆法國冠軍練馬師效力，雖然唔知幾時先可以披甲，但佢希望一早到法國，幫手操馬學嘢之餘，一路等機會。至於潘明輝，今個暑假一樣到新加坡上陣，上年暑假亦有客串當地賽事，也獲頭馬進帳，今個暑假進一步去深造，希望騎技更進一步。
講番今日跑馬地夜賽，兩位華將為爭告東尼獎都非常努力，連日下午出入今次所效力馬房仄馬，其中梁家俊周一排位朝便入容廄睇「鵰神」（圖23號），入到馬房時候，此駒正由華籍助手拍副練曾超祺「美夢成真」於地堂踱步，兩駒拍踱一陣，騎練則在場睇到實一實，當踱步完畢，兩駒又出機坪再踱，期間騎練細細聲密斟，稍後梁家俊便離去，不過，倉主依然一直逗留在倉內，待「鵰神」喺機坪踱步完畢，再聽取鞍上助手所提供意見，這個時候釘甲師出現，倉主亦睇埋「鵰神」釘甲過程，並親自細心檢查四蹄才放心。呢隻「鵰神」上場經已在谷草一千米上名，但今戰卻跑谷草千二，相信幕後已試準性能，睇部署胸有成竹。
文武傳奇越長越啱
至於潘明輝，近兩日出現於沈集成及姚本輝倉，周一佢出現沈集成馬房睇「文武傳奇」，昨日周二則到姚本輝馬房睇「旺舖大師」，據沈廄班手足講，「文武傳奇」近日操練加強，狀態進展相當理想，上場由吳嘉晉所跑嗰場谷草千八米，雖然只得第十名，但末段呢匹馬衝得最勁，只係輸俾頭馬「飛雲寶」約五個身位，呢隻馬屬一隻慢熱長途馬，今次跑二千二百米，肯定啱性能發揮，潘明輝獲得沈集成信任，呢隻馬有機會係今場變身。
旺舖大師試閘搶眼
另一隻「旺舖大師」，埋門曾試課泥地千二米大閘，輕鬆以一放到底姿態掄元，本來倉主有意思用黃俊替呢隻馬披甲，但因為黃俊早前曾經替蘇偉賢隻「君達星」效力，並一早應承下次會再騎番呢匹馬，咁啱「君達星」真係與「旺舖大師」同場，黃俊冇得唔講口齒，於是騎番「君達星」，不過，「旺舖大師」就益咗賀賢個見習生潘明輝，睇吓潘明輝係咪咁有運，連個天都幫佢爭個告東尼獎返嚟，論馬「旺舖大師」狀態水準係好過「君達星」。