R&F富力 (香港)足球隊主教練楊正光
世界盃今晚嚟到16強淘汰賽時刻，經過激烈嘅分組賽後，大多數嘅熱門球隊都順利晉級，而我自己今屆幾睇好嘅比利時同英格蘭當然亦順利晉身次圈。不過要數到最富戲劇性一定係阿根廷對尼日利亞嗰場，美斯嘅甦醒令整隊表現變回一支真正強隊，喺尼日利亞高強度壓迫下，仍可以製造唔少射門機會，美斯同盧祖嘅入波都唔係佢哋純熟嘅左腳射入，呢個亦可顯示出佢哋贏波嘅決心同鬥心，希望今晚佢哋喺頭場對住法國仍可保持住呢份精神。
對手法國喺分組賽中無驚無險下以2勝1和首名出線，但睇返佢哋3場嘅表現亦只屬一般。今屆法國嘅打法多以長傳為主，以基奧特作目標，配合基沙文後上進攻，但前者始終級數所限，基沙文今屆亦表現一般，單靠個人能力強，但經驗尚淺嘅麥巴比始終唔太可靠，睇返佢哋喺分組賽入球數字得3球，喺8支首名球隊中入球最少，可見攻力真係麻麻。
另外一場16強賽事烏拉圭對葡萄牙，論整體實力烏拉圭會較好，一對前鋒蘇亞雷斯同卡雲尼近兩仗表現唔錯兼有波入，估計今仗會製造唔少麻煩畀葡萄牙。至於葡萄牙除咗第一場對西班牙踢得較好外，之後兩場都完全喺水準之下，兼且都係單靠個人能力嘅球隊，到時又要睇吓C朗點樣扭轉乾坤了。