踏入七月份賽事進入倒數階段，套用跑馬術語，進入直路中段最後二百米，餘下三次賽事各路人馬除了潘頓莫雷拉冠軍之爭，基本上大局已定，站在馬迷立場，全季贏輸或者尚未定局，負數一群，時來運到可以反敗為勝，一場賽事收復過去十個月失地，話雖如此，到了最後階段人疲馬乏，實力分子經過長時間征戰，狀態走樣，未必會在賽前顯現，而且很多好馬已交出亮麗成績，評分升幅不少之下，忽然飽和絕不出奇，就以最近來說，文廄「艮志騰雲」連續兩場全熱倒灶，走勢也比前時明顯有異，潘頓解釋此駒說：「今季評分大幅增加，或需要暫且休賽。」前周日沈廄「上簽」五捷後突然包尾大敗，潘頓說：「此駒仍年輕，評分又大幅增加，該駒今季內應不會再出賽。」基本上這很合邏輯，馬不是機器，不可能永無休止地上升，此類計時炸彈時刻潛伏，幸好剛戰預算一面倒「多項領先」，足部毛病及早發現，否則結果不難想像，所以任何情況下，都不應孤注一擲，不單季尾如是，跑馬可以玩可以賭，大家都必須量力而為。
另一邊廂，經過兩年來多次跨境馬匹運送演練，首批長遠進駐從化馬匹訓練中心馬匹，早前由沙田順利抵埗，標誌住中心開始運作，以及香港賽馬會中港兩地馬房營運模式正式啟動，下一批再進駐嘅將會係當今現役馬；多年來，每個倉口一講到呢方面，馬主多數暗示：「唔好拎我隻馬北上！」實際上，唔到佢哋話事，有乜唔滿意，甚至乎要企硬，唔該各位馬主自己同馬會有關方面拆掂，但恐怕都唔會有甚麼轉圜餘地。作為馬主大家心照，個個都簽晒馬會有權安排任何馬匹上從化同意書，白紙黑字冇得反悔，但講真，幫理不幫親，大家真係唔需要對內地從化咁抗拒，更唔應該對國內任何事戴有色眼鏡，九大馬房告東尼、方嘉柏、大摩、蘇保羅、葉楚航、沈集成、蔡約翰、蘇偉賢及徐雨石，都有熟手技工上去睇檔，馬會對呢個項目又睇得咁實，佢哋仲緊張過啲馬主，仲有一點好似冇乜人提過，呢九位廐主下季因為可以最多收七十匹馬，畢業頭馬下限將會提高到十八場，而唔係一向標準數字的十六場。呢個安排似乎已為未來提升贏馬下限埋咗伏筆，加上養馬上限提增至七十匹，唔代表一定養足有七十隻，咁如果一個倉得五十隻，但有部份上咗去，咁各大倉口想贏十八場都唔容易喎。