楊正光 R&F富力(香港)足球隊主教練
喺世界盃期間，好多人都會留意到各球隊嘅戰果，或者球員嘅表現，再深入啲可能研究埋打法、陣式、調動等等。而我作為教練，我會再仔細去諗吓教練嘅安排，從未比賽前教練點樣去準備好一場比賽呢？因為我相信有充足嘅安排同埋準備會對爭取好成績有好大幫助。仲有教練喺球場中嘅行為，從電視所見比賽後無論贏或輸，教練團都會走到球場中鼓勵或安慰球員，呢個係表現教練們與球員們建立良好關係嘅行為，亦可建立團隊精神。
一隊出色嘅球隊，除咗要擁有一班出色嘅球員外，教練團亦非常重要，當然主教練係一個領導嘅角色，但其實一班助教隨時先係爭標嘅它琚A今屆本人認為比利時主教練馬天尼斯係一個我值得學習嘅榜樣，因佢自己好清楚球隊需要咩，缺乏咗咩，所以特意邀請咗前法國國腳射手亨利出任助教一職，因馬天尼斯好清楚佢自己缺乏嘅係世界盃經驗，所以亨利絕對可以彌補到呢個不足。
之前佢哋喺8強以2：1贏咗巴西，亦唔係一件意外嘅事，睇返今屆佢哋真係進步咗好多，尤其打反擊嘅時候，由後場截波後，好快速已傳到中場，由迪布尼或夏薩特去策動攻擊，前鋒盧卡古亦作出好多拉扯嘅走動，製造空位畀隊友後上射門，整個行動及配合絕對係一個教材式嘅示範，呢一招亦係亨利喺阿仙奴全盛時期最大嘅殺着，所以比利時贏世界盃絕對唔係天方夜譚。