早輪有位馬主，愛駒三番四次上陣，可惜每次均失望而回，有次搏輸返嚟，倉主忍唔住衝到解鞍處，向騎師問過究竟，但當時該位騎者你有你問，佢有佢耷低個頭解鞍，事後有人向呢位騎師問番呢單嘢，佢只答一句，有邊個唔想贏馬。上述兩位主角就係「興爾」上次出擊騎練。
「興爾」幕後養唔少馬喺澳門，上年雷神替「興圖」贏咗澳門打吡，當然雷神有客串酬金，幾多就唔知，不過聽澳門班知內情人士講，「興圖」馬主鄧生將所有獎金派俾馬房，連騎開呢隻馬嘅騎師一樣有得分，事關鄧生認為，「興圖」上手騎師跑得唔錯，不過請到雷神，所以要佢讓出坐騎，隻馬贏得彩金佢亦應該有份，所以嗰次「興圖」贏馬，可以話皆大歡喜。
「興爾」屬幕後在港第一匹賽駒，初期原意引入想跑打吡大賽，但因為適應水土問題，加上情緒有緊張毛病，狀態遲遲至進入佳境，正如上次史卓豐拚失呢隻馬咁，佢都想替「興爾」贏，但遲遲拉唔出隻馬望空衝，所以令到幕後掃興。由於幕後好希望拉頭馬，上場再一次失望，事後經已叮囑倉主要找雷神壓陣，因此「興爾」配雷神呢個組合幾個禮拜前已落實，大家不難明白點解雷神有新勝「馬索爾」都唔騎，而揀呢隻「興爾」。之唔係一個誠信問題，雷神與鄧生澳門贏打吡，大家有過合作愉快經驗，人家開到口想拉頭馬，睇過呢隻馬又唔係水皮貨色，二話不說就應承咗，即使到最後有隻更好馬出現，雷神亦唔會反悔。今次「興爾」所跑呢場二班千六米，呢個路程來港前贏過兩次，所以一定適合腳法，更何況幕後恨拉頭馬已久，假如呢仗「興爾」有閃失嘅話，下季呢一系馬會唔會再喺苗禮德馬房繼續打天下都成問題，因此，馬房、馬主及騎師嘅鬥志均高昂之際，呢隻「興爾」值得大家一吼。