■節目中，霆鋒示範拉麵條。香港文匯報訊 由謝霆鋒任嘉賓主持的ViuTV節目《鋒味前奏》今日播出最新一集，節目中亦示範整麵條。
問拍了多年戲的霆鋒哪次拍攝經驗是最難忘？霆鋒即說是他17歲時拍的第一部電影《新古惑仔之少年激鬥篇》，他說：「同劉偉強傾傾吓偈，突然間發現我對白飯魚，成對都係紅色， 一拎出嚟就係半隻鞋咁倒血，原來開咗個腳眼，跟住導演話『唔拍啦！入去醫院！快啲！去！』你知啦，年少氣盛的我， 再加上有啲責任感嘅，嘻嘻，就話冇事，我繼續拍。 跟住我哋兩個喺度嗌交，我話『冇事！繼續拍！幫我洗傷口！』 幫我洗傷口嗰位工作人員喺地下執咗隻拖鞋，叫我咬住。 我想嗌唔好，跟住佢兜頭就冚咗我一巴，話『咬住佢！』 一洗完傷口，其實已經見到白色嘅骨，跟住用大力膠布紮實大髀，紮到唔流血，然後繼續拍打戲，5個零鐘之後就入咗醫院。」
霆鋒透露去到醫院還有後續，說：「縫針前醫生同我講『靚仔，嗱，我哋同你縫，唔代表你身體係冇破傷風菌，如果有嘅話， 我哋要幫你斬咗隻腳，或者會有人命嘅危險。』縫到最尾嗰針， 我同佢講『我乜都試過喎，縫針就未試過，不如你畀我自己縫吖。 』哈哈哈，跟住佢望一望我，又望一望我隻腳，覺得『唉！ 真係冇得救呀你！』」
不經不覺，霆鋒已弄好麵條，更拿出衣架將麵條掛起，對於之前他用衣架掛麵而引起一時熱話，他解釋說：「我啱啱同一個意大利名廚比賽，我問佢『how do you hang your pasta？（你怎樣掛你的麵？）』佢話用佢掃把支棍！」所以他認為這是最傳統的方法。