■小鳳姐(左)親民又貼地。香港文匯報訊（實習記者 張雅婷）日前徐小鳳作客TVB娛樂新聞台節目《StarTalk》，接受主播許文軒專訪，大談即將舉行紅館個唱感受。對於演唱會歌衫方面，小鳳姐笑說：「一定會着衫！大家可以放心！」問到經典波點裙會否再現舞台時，小鳳姐表示非常矛盾，她說：「我有改過用唔同顏色嘅波點裙，但着咗之後覺得自己好幼稚，於是放棄咗，好似垃圾蟲咁！唔知點解都係黑白順眼啲，但我會繼續試唔同嘅顏色。」
小鳳姐一向非常幽默，而且親民又貼地，原來小鳳姐對一些時下玩意好似瑜伽、唱K、行山同街頭跑步等亦有留意，絕對跟得上潮流！對於Busking（街頭賣唱），小鳳姐則說：「我第一時間諗嘅係啲音響得咩？我都想去feel下，其實外國係好普遍，但佢哋會分開遠啲咁玩，喺香港逼埋一堆，大家只係鬥大聲，聽嗰個都好辛苦。」問到小鳳姐會否在街邊食魚蛋時，她說：「以前有，近期少啲，但我會買外賣，唔會企喺度食，我要為香港文化打氣，食魚蛋冇問題！」而小鳳姐亦自爆出埠玩過山車經歷，她說：「最近出埠玩過山車，坐完好後悔，以前都好少玩，今次無啦啦傻咗去玩。（驚唔驚？）梗係驚！仲驚咗好耐，以後唔敢玩。」