近年每位新練馬師開倉首季多有驚人表現，上季羅富全開倉取得六十五場頭馬，其實已經好厲害，只係遇上更強的師父蔡約翰才屈居亞軍。今季丁冠豪開倉立萬迅即站穩陣腳，頭馬數字與告東尼及苗禮德等大師級看齊，後兩者均曾經訓練過馬王，前者有「精英大師」成為世界經典，後者的「雄心威龍」亦曾威盡一時，丁仔現時開季開得好，爭頭馬係重中之重，下一步，先至係如何尋找出得起錢的馬主，然後才物色馬王級的良駒，提升自己成為級際賽練馬師。丁仔目前只係低班練馬師有待「升呢」，但之前憑「勝利寶石」取得連捷，其實係一場省靚招牌之作，事關該駒今季剛轉八歲，今季易廄兩戰全勝，已經係丁仔練馬實力的最佳證明。今次賽事「追風者」，在西澳服役三次全勝，包括勝出雅士閣馬場表列賽，近年不少西澳洲馬均能在港取勝，預計「追風者」目前評分有利，操好而來隨時起筷。